I lmend n tuɣalin-is i usayes ddurt yezrin, yeqbel Mennad ad aɣ-d-yerr i kra n yisteqsiyen, i Uɣmis n Yimaziɣen.
Aɣmis n Yimaziɣen: Deg Montréal i d-tuɣaleḍ i usayes (scène) seld lɣiba meqqren. Amek i ak-id-tqenneɛ tddukkla Imdukkal n TQ5 ?
Mennad: Ur yeshil wara. Ddeqs n wawal i ilḥan gar-aneγ, ɣer taggara, nemsefham d terbaɛt n TQ5 γef tirza-inu γer Montréal.
Ad d-yeḍfer waya kra n ttiɛad nniḍen akked uzayez (public) ma yella tufiḍ tignatin igerrzen ?
Ur d-qqareγ ara ala ma llant tegnatin n lɛali ideg zemreγ ad d-senfaliγ kra n wayen-nni akk i jemɛeγ iseggasen-agi yezrin.
Gar sebbat n lɣiba-k, d liḥala iweɛren n unaẓur di tallit-nni. Ma yella d ta kan i d sebba, ur twalaḍ belli tuyseḍ ɣef zik lḥal ?
Tɛedda s lekmal taɛecret (décennie) n 80 ur d-mlaleγ d walbaɛḍ ara yi-yesselḥun deg umaḍal n usayes. Dγa uyseɣ, lhiγ-d d wayen-nniḍen.
Gar yirgazen n yidles i temlaleḍ, yella Dda Lmulud d Muḥya. Awal ɣef wassaɣ-ik akked umaru Ɛmer Mezdad, imi tecniḍ kra n yiḍrisen-is…
Nekk d Ɛmer Mezdad nemyussan si tazwara n yiseggasen n 70. Netta yella imir-n d anelmad n tesnujjya di Lezzayer tamaneγt. Ma d nekk lliγ d anelmad n tesnawit. Tessemlalaγ teswiɛt deg temsirin n Dda Lmulud di « La Fac Centrale ». Syin akkin, Ɛmer yettmuddu-yi-d sya γer da iḍrisen i wakken ad ten-cnuγ. Akken-nni armi sawḍeγ ad d-suffγeγ yiwen n walbum di 1980, wis sin di 1983. Deg-sen ddeqs n yisefra-ines.
Neẓra telliḍ d anemhal n usenfar n usisleg n Nello ɣer teqbaylit. Mmeslay-aɣ-d cwiṭ ɣef waya…
D imdebber n tiliẓri BRTV, Mass Muḥemmed Saɛdi, i yi-d-inecden i wakken ad suqleγ γer teqbaylit tiftarin (documents) n wunuγen yettewliwilen, yecban Tristan et Yseult, Nello, Père Castor, atg. Niqal kukraγ, mi bdiγ armud-a, ufiγ d ayen yesɛan azal, iseg ad d-sfaydin yimecṭaḥ-nneγ. Ladγa mi as-ufiγ lbenna.
Amek twalaḍ ccna n teqbaylit iseggasen-a ineggura ?
Walaγ tizlit taqbaylit am akken tulwa. Azayez (le public) s umata yessutur kan ayen isehlen, ladγa imi tuget n yinaẓuren yewwi-ten lmil γer din. D ayen iɣef nezmer ad nesḥissef. Cwi kan llan wid i d-isqeɛden tagnit, am Ɛli Ɛemran, Tenna, Ǧamal Kalun, Tirebbuyaɛ Talsa akked Amzik.
Ad ak-nesnemmer. Awal-ik n taggara…
Tanemmirt i wid yuzzlen i wakken tuγalin-iw γer uẓawan ad tili d tilawt. Ladγa TQ5, tiliẓri taqbaylit (tazwawt) n Kanada. Ad farṣeγ tagnit i wakken ad ak-d-iniγ i kečč a Mhenni tanemmirt tafwayant γef uxeddim-ik.
Yesteqsa-t M. K.