Deg smana-agi i d-yeffeɣ udlis ‘’L’écriture romanesque kabyle d’expression berbère’’ n Dr Nasserdine AIT OUALI ɣer tezrigin l’Odyssée.
Adlis-a, d asenqed ɣef wayen yuran s teqbaylit seg useggas n 1946 armi 2014, ama d ayen yeɛnan ungalen neɣ tullisin. Mebɛed mi d-yefka deg tazwara amezruy n tira n tmaziɣt s umata akked tmukrist n wullis, Nasserdine AIT OUALI yudder-d sebbat i yeǧǧan tasekla n tmaziɣt ad tidir deg yiɛewwiqen, ladɣa, seg tama n tsertit akked lexṣas n tzemmar n tira ɣer kra n yimruya. Acu kan, xas ulamma yewwet-d s leqseḥ deg kra n tira ur nebni ɣef yilugan n tsekla meɛna yenna-d d akken llan kra ttarun akken igerrez u yis-sen i tezmer ad tenefli tira taqbaylit. Am wakken i d-yefka, diɣ, kra n yiwellihen i ilaqen i usnerni n tsekla taqbaylit. Tazrewt-a, tebḍa ɣef sin yiḥricen. Aḥric amezwaru yettmeslay-d ɣef ungal deg 6 n yixfawen, ma d wis sin yewwi-d ɣef tullis deg 3 yixfawen. Deg uḥric amezwaru, yenna-d d akken d Belaid Ait Ali i d bab n wungal amezwaru ‘’Lwali n wedrar’’. Syin yudder-d imyura imenza Rachid Aliche d Said Sadi d wayen uran. Ikemmel deg useqed-is i yimyura i d-yusan umebɛed, am Amar Mezdad, Salem Zenia, Aomar Oulamara, Lynda Koudache, Said Iamrache, tahar Ould Amar Akked Boualem Rabia.
Deg uḥric wis sin, yessenqed tullisin i yuran : Meziane Ou Mouh, Idir Ahmed Zayed, Meziane Boulariah, Kamel Bouamara, Lynda Koudache, Djamila Mimeche, Dihya Lwiz, Rabha Aissou, Djamel Arezki, Said Chemakh, Zimu akked Abdelaziz hassani.
I usmekti, Nasserdien AIT OUALI yesɛa duktura deg tsekla tafrensist n tesdawit Paris 8. Am wakken i d-yella deg lmendad deg udlis i d-yeffɣen deg useggas n 2013 ɣer tezrigin L’Odysée, ‘’De la pédagogie de projet et de l’enseignement de la langue amazighe en Kabylie.’’, d ayen ara yefken afud ameqqran i yinelmaden n tesdawit akked wid akk tecɣeb tsekla taqbaylit.
Hocine. M