Akken d-eqqaṛen imezwura, tissirt mi ara tt-taɣ di leryac, ulac d acu ara s d-eggen d iɣuṛaf. Zzik, aɣref amaziɣ yekkat kan amek ara isnerni idles-is, ad iḥareb ɣef amezruy-is d tutlayt-nni ɣef ayeg uzlen idammen, ɣlin yergazen akken ad tt-erren d tunṣibt. ɛeddan iseggasen, rnan wiyyaḍ deffir-nsen, maca iswi-agi n tmetti taqbaylit asmi ala yettibɛid. Yuɣal-asen am win yettqadamen tili-s. Mi xedmen lqedma ɣer zdat, nettat ad texdem tayeḍ. Si zzik, imyura, imedyazen, ineɣmasen, imazrayen, inaẓuṛen qaren-d d akken leqdic-agi, ɣef ayeg ɛeddan, lesnin ur yeshil ara. Tamaziɣt ur yeshil ara ad tuɣal d tunṣibt, maca asirem yezga yella ɣer yidis-nsen. D netta isen-yefkan tabɣest ar almi ṣawḍen ad ṭfen tudert i tutlayt-agi umu zzin aṭas n yeɛdawen yebɣan ad s yezmen iẓuṛan. Ar assa n wussan, tamaziɣt mazzal ala tettnazzaɛ di tesga. Aṭan yekcem ɣer yiɣes. « Tamaziɣt teṛṛeẓ deg iferr, wissen ma ad tekker, lǧerḥ ikcem-it ssem», i yecna Matoub Lounès. Imezwura yeṛẓan asalu, llan suturen deg wid yellan deg tqacuct n udabu akken ad erren tutlayt d tunṣibt, akken ad s-efken amkan-is deg iɣerbazen,…maca tura yeɛṛeq cedda n tyerriste. Leqbayel uɣalen feṛqen am ibawen ɣef lluḥ. Kra nzan, kra ṭṣen, kra nniḍen zewren adabu akken ad zerɛen burekku ger watmaten-nsen. Yal aseggas, di 20 yebrir, ttheggin-d tikliwin akken ad d-smektin ass-a, akken ad mlalen w’ad d-inin d akken ur uɣalen ara ɣer beffir, mazzal ttazzalen deffir n yiswi-nsen, iswi yessazlen aṭas n tsutiwin. Acu, aseggas-agi, yella-d umaynut: Tikli d-ittwaheggan tettwaḥbes uqbel ad tebdu.
Tadyant-agi tbeggen-ed d akken tudert n tutlayt-agi tettwaɛelleq ɣer udabu yebɣan ad tt-yemḥu w’ad yekbel tilelli n wid tt-yettmeslayen. Tkli, yellan d ttuɛud uɣur d-ttemlalen-t telmeẓyin d-ittefɣen s tekessiwin d lfeṭṭa, tilawin, irgazen d yelmeẓyen, ɣer iberdan, ɣef teɣzi n 24 iseggasen, umu ur ǧǧin ara ad d-eḍṛu, tbeggen-ed tixidas d tikerkas n udabu.
Z. T