Accueil Tamazight «Xedmeɣ adlis-a i yinelmaden yeqqaren tamaziɣt akken ad ten-iɛiwen ».

Lɛerbi Yeḥyun

«Xedmeɣ adlis-a i yinelmaden yeqqaren tamaziɣt akken ad ten-iɛiwen ».

16248

Ilmend n tuffɣa n udlis «Abrid ɣer ukayad n Tmaziɣt» s tallelt n Tesbeddit Tiregwa, ara yili d aɛwin i warrac ara yesɛeddin ikayaden n BAK d BEM, nefren ad d-nessesten ameskar-is mass Lɛerbi Yeḥyun akken ad nesɛu ugar n yisallen fell-as. Hatan wayen iɣef nemmeslay.

Aɣmis n Yimaziɣen : Ahat Ad aɣ-d-tiniḍ tazwara anwa i d Lɛerbi i wid ur k-nessin?

Lɛerbi Yeḥyun : Mass Lɛerbi Yeḥyun, ilul deg Uqbu, aɣir n Bgayet. D aselmad n tutlayt d tsekla Tamaziɣt deg uɣerbaz alemmas n Yiɣil Ɛli. D yiwen umeɣnas i irefden amennuɣ ɣef tumast d yidles amaziɣ s wawal akked dira. Yura yakan ammud n yisefra i wumi isemma «Tayri n Umedyaz» i d-yeffɣen s lmendad n Usqamu Unnig n Timmuzɣa (HCA) deg useggas n 2014.

Tessufɣeḍ-d taggara-a yiwen n udlis i yinelmaden ara yesɛeddin aBAK s tallelt n Tesbeddit Tiregwa, eg-aneɣ-d taḥawact fell-as…

Adlis-iw «Abrid ɣer ukayad n Tmaziɣt» d adlis wis sin i d-ssuffɣeɣ s ufus n tallelt n Tesbeddit Takanadit Tiregwa, xedmeɣ-t-id i yinelmaden yeqqaren tamaziɣt, akken ad asen-yili d amnir (guide) ara ten-yallen u ad ten-iɛiwen deg umecwar-nsen n tɣuri, akken ad heggin iman-nsen i yikayaden unsiben : BEM d BAC. Ma d ayen yerzan agbur, deg-s ad naf : agzul n temsirin s tewzel ; 10 n yikayaden yemgaraden ilmend n tsekka taḍrisant (aḍris ullis, aḍris agelman, aḍris asegzay d uḍris imesfukel) ; aseɣti n yikayaden-a d yifarisen s tira ; iḍrisen i tɣuri ɣef tmedyezt d tsekla taqbaylit ideg yella yiwen usefru yessaḍsayen akked yiwet tmezgunt i warrac.

Akken i t-id-yeqqar uzwel-is, adlis-a ad yenfaɛ ihi wid ara yesɛeddin akayad n BAK? Imi ulac-it deg tnedlisin anda yezmer ad t-yaf unelmad?

D tidet, ur yelli ara deg waṭas n tnedlisin, imi yeffeɣ-d i ddemma n bab-is, ɣef waya amur ameqqran deg-sen senzeɣ-ten deg yiɣerbazen ilemmasen akked tesnawiyin, srid seg ufus-iw ɣer ufus n yinelmaden, akken diɣen i iyi-ɛawnen kra n yiselmaden akked tselmaden, imi wwin adlis-iw akken ad t-seknen i warrac i iran ad t-id-aɣen. Ma d win yebɣan ad t-id-yaɣ, yella deg tnedlist Haroun Mohamed deg Uqbu akked tnedlis Gouraya Culture deg Bgayet.

Akken nettwali deg wannar, yettmagar-d umaru aṭas n wuguren sdat-s?

Win ileḥḥun akk deg ubrid n yidles d tnaslit, yettmaggar-d uguren, d abrid n tẓuri neɣ d abrid n tira kifkif-nsen, ula d amaru yesɛa uguren-is, imi adlis n tmaziɣt ur iteddu ara s waṭas acku drus i t-yeqqaren imi tugget n yiqbayliyen ur tt-ɣrin ara deg uɣerbaz. Tin ɣur-s, ugur n teẓrigin, imi yuɛer ad tafeḍ win ara d-yessuffɣen adlis n tmaziɣt, ɣef waya i ttwaliɣ dakken «Tira d amennuɣ», amaru ilaq ad yennaɣ d yiman-is akken ad d-yaru ayen yettxemmim d wayen yettḥulfu, ilaq ad yennaɣ d teswaɛt akken ad yaf win ara as-d-yessuffɣen adlis-is, ilaq diɣen ad yennaɣ d tmetti akken ad yessiweḍ izen-is i yimdanen d wid akk ara t-yeɣren, akka i d tudert n umaru deg tmurt ur nerri azal i umaru.

Awal-ik n taggara?

Ad d-iniɣ kan, tanemmirt i kra n win d tin i d-yefkan afus n tallelt akken ad d-yeffeɣ udlis-iw u ad yaweḍ afus n unelmad, tanemmirt i kra n win i yi-d-yefkan tabɣest akken ad kemmleɣ tikli-w deg ubrid n tira, tanemmirt diɣen i kečč a M’henni ɣef tdiwennit-a. Ar tikkelt-nniḍen deg lehna.

Yesteqsa-t : Mhenni Xalifi