Ahat ɣur ddeqs n medden, yemmug ugḍiḍ akken kan ad yidir tilelli-yis d afferfer deg yigenwan, ɣur wiyaḍ d lɛali-yas kan tiqeffet yettɣurrun akken ad n-yeǧǧ dinna tarwiḥt. Maca ɣur kra nniḍen, ur d agna-ya (choix) ur d wa i smenyifen, imi nutni ur ten-ttaǧǧan ttebrariɛen deg yigenwan, ur asen-meddin tiqefftin daɣen ; wanag ttaɣen-ten-id s udrim sɣur yimrebbi-nsen seg ulzuz (ssuq) neɣ seg taddart, akken ad ten-id-ssekren ula d nutni deg uxxam, daɣen n tfergact (lqefs). Akken iban, mačči ɣef menwala n yigḍaḍ i la nettmeslay tura, zun ɣef uzeggaɛbur, abuḥeddad, neɣ d imdukkal-is. Maca, wid i d-ijebbden awellih n medden d wid yuqan, icebḥen, i yeɣlayen daɣen. Ɣef waya, imi babaɣayu ur yezmir yiwen ad t-iqerreb skud leḥsab n wazal-is s yimelyan, rnu wiss ma ad tafeḍ deg-s ayen akk tessarameḍ, rran ihi medden ɣer yigḍaḍ nniḍen i ten-yettcabin, ma neẓra belli qqersen-d seg yiwet n twacult, ed umi ssawalen tibiracin (tipirucin). Ɣas ur d-ttsaraxent ameslay n umdan am babaɣayuyat, maca deg ccna ẓewrent ayendin, deg ccbaḥa n tfekka-nsent daɣen skanayent-d ayen i asent-ihewwun i wallen n umecṭuḥ ed umeqqran. «Acḥal nekk d arebbi deg-sent almi uɣaleɣ nnumeɣ-itent, ur zmireɣ ad idireɣ ma ulac-itent». Ay d-yenna yiwen n yilemẓi yettrebbi-ten. Ma yella d ssuma n yibirucen-a, temgerrad seg yiwen ɣer wayeḍ, seg tewtemt ɣer uwtem, maca tettemtuttul gar 1500 n yidinaren almi d 2500 n yidinaren i uqerruy. Skud ur yewɛir usker-nsen, imi sran kan i waman akked tgella-nsen i yettnuzun, xilla n medden ttwalin deg-sen tadfi (plaisir) ugar n uqeddic.
Mhenni Xalifi