Ɣas akka 18 n yiseggasen segmi yettwaɣḍer Lounès di tala Bounane ass n 25 di yunyu 1998, mazal-it yezdeɣ allaɣ n kra n win yumnen s umennuɣ d ubrid I d-yenjer.
Amulli n tmettant-is ibeggen-d acḥal I mazal teckenteḍ deg-s tmurt n Leqbayel iwumi iɣef yecna s ttnefxa d zzux, tin akken iɣef isebbel tudert-is asmi akken yeḥma useqqi, asmi akken aṭas I yettnadin anda ara sdergen iqerra-nsen segmi ara iɛeddi uɛeǧǧaǧu n tmes. Yak yezga yeqqar: “ d idurar I d leɛmer-iw”. Acu yeǧǧan asafu yessaɣ Matoub yettenfufud ar iḍ-a mi akka nettwali aṭas n yilmeẓyen ass-a usan-d s axxam-is, rzan-d ɣer uẓekka-s ɣas akken ur tessinen ara imi meẓẓiyit deg leɛmer ? D tizlatin-is I mazal d inigan ɣef tudert-is, d umennuɣ-is. Ass-a, mi ara nsel I wayen akk yecna, ad nesɣerbel ayen akk yexdem, d awezɣi ad yamen yiwen belli yedder kan 42 n yiseggasen. D amɣar azemni s timmad-is, imi yessefra, yessukkes-d ma drus acḥal d awal n teqbaylit seg tatut. Meɛna, yal ameslay yettawi ɣer tegmat, ɣer tdukli. Aya, ad t-naf deg tesfift-is taneggarut anda yenna: “imeslayen-nni n umeddakkel Lhachimi, d Dda Lhocine neɣ Sadi, yettakken abeḥri I turet.” Ayen daɣ ara d-ijebden lwelha n win akk yeṭṭafaren tizlatin-is, dakken yessezwar ineḍruyen amek akken ahat yeẓra ad d-ḍrun. D ayen ara naf deg tezlit-nni anda yeqqar: “Ass-agi lliɣ, azekka wissen, nniɣ-d ayen zriɣ d wayen I ttwaliɣ, cfut di terga ma ɣliɣ, d anzaw ara wen-d-yessiwlen.” Taggara-s yeẓẓel di terga di tala Bunan mi akken yemmar fell-as ubruri n rrṣas. D acu kan, ayen yettuɣaḍen ass-a n wussan d ayen iwumi neḥḍer deg umulli wis 18 n tmettant-is deg uxxam-is. Imdanen usan-d s ṭṭaqa ɣer Tewrirt, aẓekka-s idel s yijeǧǧigen, “la foundation” irefden isem-is tessewjed yiwen n wahil d amerkanti I usmekti-is. Maca, yella-d akka kra n yiceqqiq I izemren ad yaɣ aẓar ma yella mazal neṭṭafar abrid n tikreḍt. skud akka yal wa yeqqar d nekk ay d nekk ad nesluɣ tapwwint yessazdeg Lwennas. Anida-t yizen n Ugrawliw iteddun s uzday n lqedd ɣef tegmat mi neḥḍer I wid yeqqaren d nekkni ma ulac ala ? Ɣas ultma-s Malika ur as-ǧǧin ara awal deg…uxxam-is ! D leɛǧab. Nesla I yir ameslay yerran srid ɣer yiwen akken I tuḥwaǧ twacult n Matoub iwakken ad d-yefk cchada-s ɣef tmettant n Lwennas. Qqersen leqyud, yettwakkes sser ɣef yirgazen mi akken iwulem tixnefyac n lfuci ilaq ad rrent lewhi n yixṣimen yettwafeḍḥen. Lḥaṣun d awal-nni I d-yenna Lounis mi t-yeddem ula d netta uɛeǧǧaǧu n rregmat mi d-yenna:”on n’est pas encore sorti de l’auberge.” D lawan ad d-nesɣim i wawal imi d netta i iferrun tilufa iwakken «yal Aqbayli ad t-nesseḥḍer amek akka iteddunt temsal.” Yak d netta I t-id-yennan. Acku, abrid-a I d-nuɣ ad nebḍu am yibawen ɣef lluḥ ad as-ngerrez tamgerḍt uzaglu. Yewɛer ṣṣwab I tifin ! Ay tafat n tifrat, mmel-aɣ abrid ɣer sdat, ṭṭes di talwit ay agrawliw !
Smail. M