‘’Akken qqaren yimezwura ‘Nnig ubrid, ddaw ubrid, leqrar-is d abrid’. Neɛya nettwali amus deg yal amekkan u nekni nerra iman-nneɣ am wakken ur neẓri ara.’’
Akka i aɣ-d-yenna Amar, yiwen ilemẓi i nemlal deg tcemlit n usezdeg i xedmen yilmeẓyen n taddart n Tala Athmane, taɣiwant n Tizi Uzzu. ‘’Nella nhedder deg sin yid-neɣ ɣef wamus i nufa deg tala. Iqerrḥaɣ lḥal ayen din. Nenna-as ilaq ad nessizdeg taddart-nneɣ am nekni am wiyaḍ, ladɣa, imi imezdaɣ-is uɣen tannumi deg tcemlit zik-nni. Ihi, Nemmeslay akked kra n yilmeẓyen u negzem-itt d rray belli ad tili tcemlit ass n lǧemɛa. Dayen i d-yeḍran ass-a.’’ D wi i d awalen n Mokrane akked Hmidouche, sin yilmeẓyen gar wid i d-iheggan tacemlit-nni. Bdan tacemlit kra n yilmeẓyen kan axater ur tesli ara akk taddart, imi tasqamut-is ur d-thegga ara alɣu. Acu kan, akken qqaren ‘’Seg ucrured ɣer tikli’’, akken kan i d-walan Wat taddart leqdic, kkren-d u fkan-d afus n tallelt, ladɣa, ilmeẓyen d warrac imecṭaḥ. Yal wa d acu i d-yewwi, wa d aqabac, wa d lmesḥa, wayeḍ d amger…atg. Lḥasun, deg kra kan lweqt, yeččur-d ugraw ɣer ubrid uɣur fkan ttiɛad. Dinna, bdan tacemlit s nnecraḥa akked yiseɣ imi yal yiwen deg-sen iḥus dakken la ixeddem ayen yelhan i taddart-is akked twennadt. Rnu ɣer wanect-a, tabɣest tameqqrant i asen-ssawaḍen yimsebriden i d-iɛeddan seg ubrid-nni imi ass-nni d ssuq deg Tala Athmane. ‘’Ha-tt-an ihi tgerrez tikti-a. Ula d wid i d-iɛeddan deg ubrid-a, nessaram ad leqmen tikti-a u ad xedmen akka am nekni deg yal amekkan n tmurt n leqbayel. Bezzaf tenṭer tmurt-nneɣ, yal amekkan d aqabuc. Ad as-tiniḍ bran i ṭṭbel deg waman.’’ i yessaram Belaid. Ma d mouhend, iwala dakken tuddart n leqbayel, bdan la d-ttnekkarent ɣer leqdic am wakken llan yimezwura-nnsen. ‘’Uɣalen yimezdaɣ n tudrin ɣer leɛwayed-nni n zik. Meḥsub tacemlit akked tmecreḍt d wayen-nniḍen. Aṭas, dɣa, i d-yelhan seg uḥric-agi n tezdeg. Llant ula d tiddukkliwin i lmend n waya. Leqdic, yella-d, ahat, imi tewweḍ tyarza s aḥdid i d-nddekwalen.’’ Akken yebɣu yili wayen i ten-id-yesduqqsen, ayen xedmen yilmeẓyen n taddart n Tala Athmane, yuklal leqder d ucekker. Nessaram ad yili d amedya i wiyaḍ. D ta i taqbaylit i reṣṣan lejdud, d ta i d taqbaylit i tebɣa tmurt. Ilmeẓyen n Tala Athmane, beggsen-d ad kemmlen amecwar-agi n usizdeg yal ass n lǧemɛa. Afud igerrzen ay arrac.
Hocine.Moula