Accueil Tamazight Timecreḍt n ḥartadem

Aït Assia Mimoun : Timecreḍt n ḥartadem

692
- PUBLICITÉ -

Tanzayt n wass-nni n 1u n wunbir i iεeddan, snat n tuddar seg tudrin n tɣiwant n Ait Assia Mimoun gant timeceḍt n ḥartadem. Tuddar-agi d Iɣil n Wuccen d taddart n Uqawej. Imi deg taddart n Uqawej zlan aseggas-agi 9 n yizgaren, acku d taddart meqqren aṭas. Ma deg taddart n Yiɣil n Wuccen zlan 4 n yizgaren. Ma yella deg taddart n At Ttxelfat zlan kan yiwen n uzger ass-nni n lğemεa 04/11/2016, imi taddart-agi meẓẓiyet aṭas aṭas.Tuddar-agi, mazal ṭṭfent deg wansayen iqdimen, i d-ğğan lejdud-nneɣ. Ma d iswi n lewziεat-agi n ḥartadem, ɣef wakken i d-qqaren yimɣaren, xedmen-tent i lmend n tfelaḥt, ssuturen deg Sidi Rebbi ad d-tili ṣṣaba deg nneεma, ad d-yessew wakal s waman n ugeffur, ad issebεed tiwaɣiyin n twenaḍt. Am wakken neẓra belli lewziεa tesεa azal d ameqqran deg tmetti taqbaylit, ama zik ama tura. D tagnit ideg ttemlilin medden, imi yezmer lḥal aseggas ur ttemyagaren ara, imi yal yiwen yelha kan deg ccɣel-is, am wakken qqaren zik: “ temmlal tasa d way turew”. D tagnit daɣen ideg ttemεawanen yimdanen gar-asen, imi yal yiwen ad yexdem ayen iwumi yezmer. D ass ur necbi wiyaḍ, imi taddart si rrif armi d rrif ad tečč akk yiwen n yimensi s uksum, am ugellil am unesbaɣur, yiwet n lmakla ara ččen. D tagnit anida tettnerni tegmat, anida daɣen ttiğhidden wassaɣen gar yimezdaɣ n yal taddart.

- PUBLICITÉ -

Adaoun Abdelghani

- PUBLICITÉ -