Ass n 7 deg yennayer iɛeddan, yella ujenyur deg tsenselkimt Mass Muḥend Belqasem d inebgi n Tdukkla Tadelsant Tiɛwinin i usenɛet n yiwen n usarag s wazal-is. Asarag-a, yewwi-d ɣef tsenselkimt s tezwawt. Imi simmal yettili-d uqeddic sɣur kra n trebbuyaɛ, simmal tbeddu tezwawt, tseɛɛu amkan deg umaḍal n Web. Yemmeslay-d mass Muḥend Belqasem ɣef yifecka isenselkamen(outils informatiques ) d yiseɣẓanen i d-yettwasuqlen taggara-a kan ɣer tezwawt; am Mozilla, LibreOffice, Thunderbird , Skype, atg. ‘’Newwi-d awal s umata ɣef wazal n useqdec n tsenselkimt s tezwawt. S tezwawt dɣa, mačči s tmaziɣt. Nesken-d ula d ttbut s wudem ussnan acimi ilaq isekkilen ilatiniyen mačči d wiyaḍ», i aɣ-d-yenna win igan asarag. Ugar n waya, iberreḥ-d umsureg ula ɣef yisenfaren isenselkamen i yellan deg ddhen, neɣ deg ubrid n beddu. Ɣas ahat ttwalaqayen-d ayendin d ugur, am ttawilat d tuɛert n usuqel n kra n tenfaliyin, meɛna anda yella lebɣi, ɣelbent-t tzemmar. Ma ɣef tegnit s umata i d-yellan ddaw tecḍaḍt n Tdukkla Turmidt Tiɛwinin, yenna-aneɣ-d Muḥend Belqasem: ‘’zemreɣ ad d-iniɣ tgerrez s waṭas. Ur urǧiɣ ara ad d-asen wannect-nni d imdanen, ad ḥeḍren, gar yilemẓiyen d yimɣaren. Yiwen n umɣar ɣlin-as-d ula d yimeṭṭawen imi yeẓra sanda tewweḍ tutlayt-nneɣ’’. S wakka, yemlal uqeddic n Tdukkla Tiɛwinin, i as-yekkren i usuddes n yisaragen, akked yiwen n umeɣnas d umussnaw deg wannar-a n tsenselkimt, almi d-fkan agemmuḍ yelhan.
M. K.