Mazal d FLN i yeṭṭfen amḍiq amezwaru deg Useqqamu aɣerfan aɣelnaw s 164 n yimekwan i d-yewwi deg tefranin-agi n 4 maggu 2017, xas ulmma iwexxer ɣer deffir, ma neqren igemmaḍ-a akked wid n useggas 2012 anda i d-iḥella 208.
Sumata, ffɣen-d yigemmaḍ ɣef wakken yella wudem n tsertit deg tmurt n Lezzayer. Ula d wid igan taslaḍt i yigemmaḍ-a, nnan-d yettban akka ara d-ffɣen. Mazal d ikubar-nni yewwin neɣ yeddan deg wahil n uselway n tegduda i d-yezgan d imezwura, gar-asen ad naf : FLN, RND, TAJ, MPA. Gar 462 n yimekwan i yesɛa Useqqamu aɣerfan aɣelnaw, amur ameqqran wwin-t FLN akked RND. Yewwi umezwaru 164, gar-asen 50 n tlawin, ma d RND, yewwi 97 gar-asen 32 n tlawin. Ɣef wakken i d-yenna Derbal, imḍebber n HIISE, azal n 330 n yicetkiyen i d-yewḍen ɣer tesqamut-agi-nsen. Xas ulamma, ɛeddan tefranin, sumata, akken iwata, meɛna yella-d kra n ccwal deg kra n temnaḍin n tmurt, ɛlaḥsab n Berbal. Ma ɣef ugemmuḍ n uttekki i yewḍen 38,25%, yettuneḥsab d alemmas sɣur aneɣlaf n daxel. « Akken yebɣu yili lḥal, aɣref azzayri, yerra-d i teɣri akken iwata », ikemmel yenna. Ma ɣef yicetkiyen, yenna-d : « h-tent-in tura tewwura n tesqamut HIISE, ldint i wid yesɛan aceti. Tasqamut-a, ad texdem akk ayen yellan fell-as ». Ma ɣef lexsas i d-yeḍran deg tefranin-agi, ama ɣef cwal, ama ɣef wid ur nessaweḍ ara ad kkin deg tefranin imi yella wanda ur wwiḍent ara tbewwaḍin, yenna-d Mass Bedoui « Lexsas-agi akk ad yuɣal ad yettwaseɣti sya d afella ». Ha-ten-in igemmḍ sumata : FLN 164, RND 97, A.HMS 33, Imezrigen 28, TAJ 19, NAHDA+ADALA+BINA 15, Front El Moustaqbel 14, FFS 14, MPA 13, PT 11, RCD 9, ANR 8, MEN 4, Parti El Karama 3…atg.
M. H