Sfuglent tddukkliwin tidelsanin n dayra n Wagennun, i iqedcen deg unnar n yidles, as amenzu n yennayer. Ama d tid yellan deg tɣiwant n At Ɛissa Mimun, ama deg tɣiwan Wagennun neɣ deg tɣiwant n Timizar, heggant-d leqdicat i lmend n waya. Yal yiwet s wahil-is amerkanti, yal yiwet iwumi tefren ad terr tajmilt. Nexdem tirza taggara n ddurt-agi yezrin i wakken ad nẓer amek i d-yella usmekti n yennayer deg Wagennun, sɣur tiddukkliwin n yidles.
Di tɣiwant n At Ɛissa Mimun
Deg tɣiwant-agi, yella-d usfugel n yennayer sɣur snat n tddukkliwin-agi tidelsanin “Tarwa n Uqeṭɛan” n taddart n Uqawej akked tiddukkla “Tadukli tarwa n Leɛzib” n taddart n Leɛzib n Ugni n Ɛmer. Deg tazwara, ad d-nawi awal ɣef leqdic d wahil anesbaɣur n tiddukkla tadelsant “Tarwa n Uqeṭɛan”, i d-isuddsen irmad idelsanen ɣef teɣzi n tlata wussan, gar 10 alamma d 12 yennayer 2018, i d-yellan d tajmilt i umaru i umeɣnas n tmaziɣt Bessaɛud Muḥend Aɛrab, yettwameḍlen deg taddart-agi n Uqawej. Deg wass-nni amezwaru, i d-yellan ass-nni n larebɛa 10 deg waggur n yennayer, seg 16h00 alamma d 18h00 n tmeddit, yella-d usarag n Mass Yunes Ɛedli, i d-yewwin awal umezruy n yennayer d wayen akk i icudden ɣur-s. Asarag-agi i d-yellan deg Uxxam n tiddukkla-agi, yeḍra-d deg tegnatin igerrzen, imi i d-yella diɣ uskasi ladɣa sɣur yinelmaden n uɣerbaz alemmas yellan deg taddart-agi. Ma d ass-nni n lexmis 10 yennayer, i d-yellan d ass wis sin deg ttiɛad-agi adelsan, tella-d deg uxxam n Bessaɛud Muḥend Aɛrab deg-s temsikent ɣef tudert d yimuhal n urgaz-agi ameggran, i d-yefkan aṭas i tutlayt d yidles amaziɣ s umata. Am wakken daɣen i d-tella temsikent n tɣawsiwin timensayin n Leqbayel, i d-yellan deg uxxam n tiddukkla-a, seg 9h00 alamma d 17h00 n tmeddit. Ikemmel wahil deg tmeddit n wass, dɣa yella-d deg-s ɣef 16h00 usarag n Mass Ɛebdenur Ɛebdeslam, i d-yewwin awal ɣef tuddsa n wakud s tmuɣli neɣ s tefransist “Lorganisation agraire du temps par l’observation”. Ma ɣef 20h00 n yiḍ tella-d temlilit n temɣarin, i d-yellan d tajmilt i temɣarin n taddart-agi n Uqawej. Ma d sendiḍelli n lǧemɛa 12 yennayer 2018, i d-yellan d ass aneggaru n leqdic-agi anesbaɣur, tella-d deg-s temsikent n tɣawsiwin sexdamen medden zik, seg 9h00 alammi d 17h00 n tmeddit. Ma ɣef 9h00 n ssbeḥ, yella-d usersi n tmeqqunt n yijeǧǧigen ɣef uẓekka n Bessaɛud Muḥend Aɛrab, syin akkin ɣef 9h30, llant-d tnagiyin d umeslay ɣef wayen i d-yeǧǧa Dda Muḥend. Tin ɣur-s, ɣef 10h30 n uzal, tella-d tikli uyrad sɣur yimezdaɣ deg ubrid n taddart, yettwassnen s yisem n “Carnaval”, ma ɣef 13h30 alamma d 16h00 n tmeddit, tella-d temsizzelt n uyaziḍ yufraren. Ma d tura ad nawi awal ɣef leqdic d wahil anesbaɣur n tiddukkla tadelsant “Tadukli n tarwa n Leɛzib”, i d-isuddsen irmad idelsanen ɣef teɣzi n sin wussan-agi lexmis11 akked lǧemɛa 12 yennayer 2018, i d-yellan d tazrigt tis tlata n usmekti n yennayer. Dɣa deg wass-nni wis sin, i d-yellan ass-nni n lexmis 11 yennayer, tella-d temsikent n lfeṭṭa, n tqendurin n Leqbayel, akked yidlisen d yiḍrisen n tɣamsa taqburt i d-yewwin awal ɣef unsay n yennayer di tmurt n Leqbayel, d waṭas n yisental-nniḍen.
Ma d ass-nni n lǧemɛa 12 yennayer 2018, bdan ahil-nsen s yiwet n temsikent n tɣawsiwin n zik, syin akkin ɣef 10h00 n ssbeḥ, tella-d terbaɛt n yiḍebbalen i d-yewwin kra n tezlatin. Mi yezgen wass, yella-d usečči n seksu s uyaziḍ i yinebgawen i d-yerzan ɣer taddart-agi n Laɛzib n Ugni n Ɛmer. Am wakken daɣen i d-tella tejmilt meqqren i umedyaz d umaru d uneggal ameqqran Ɛli Maqur n taddar-agi, iɣef wwḍen 17 n yiseggasen ɣef tmettant-is, dɣa tella-d temsikent d tnagiyin ɣef tudert-is d yimuhal-is. Ma ɣef 14h00 n uzal, fkan arrazen i yinelmaden iffazen yeqqaren deg nuɣerbaz amezwaru n taddart-agi, akked wid i d-yufraren deg yikayaden n tmaziɣt. Mmuden daɣen arrazen i yinaddalen i d-yufraren deg temsizzelt n tazla akked wid i d-yufraren deg temiliyin n ddabex n uḍar i d-tḥegga yakkan tddukkla-agi deg wussan yezrin. Ma seg 15h00 d afella, tella-d tmeɣra n ccna, sɣur aṭas n yinaẓuren n tamag-agi n At Ɛissa Mimun.
Di tɣiwant n Wagennun
Ula d tiddukkla tadelsant “Tamussni” n Wagennun, tella deg ttiɛad i lmend n usfugel n yennayer n useggas-a, dɣa thegga-d ɣef teɣzi n wass-nni n ssebt 13 yennayer 2018, ahil d amerkanti s wayes i d-tesmekta tawwurt n useggas ɣer yimaziɣen. D leqdic i d-tessuddes tiddukkla-agi s tallelt n Usqamu aɣerfan aɣiwan (APC) n Wagennun, axxam n yilmeẓyen n Wagennun, d leqdic i ɣef bedden yimdanen-agi: Tiqubɛini Nadya, Ɣiles Ḥeddad, Ḥaǧi Muḥend Saɛid akked Massa Bucarab Naṣira, i wakken ad yili deg tegnatin igerrzen. Yebda wahil adelsan ɣef 9 n ssbeḥ deg Uxxam n yilmeẓyen n Wagennun, s kra n temsikniyin n tqendurin n Leqbayel akked tgella sewwayen zik deg yennayer, timsikent n tẓuri…atg. Ma ɣef 13h00 n uzal, i tebda tmeɣra n ccna meqqren i deg cnan ddeqs n yicennayen, gar-asen: Karim Xelfawi, Ǧafer Ḥaǧi, Farid, Ḥaǧi Qader, Akli Begric, Belxir Ǧafer…at.
Ula di tɣiwant n Timizar
Tiddukkla tadelsant “Tussna” n Timizar, thegga-d leqdic d amerkanti i lmend n usfugel n yennayer, dɣa gan-as tajmilt meqqren umedyaz d urgaz n umezgun n taddart-agi n Ubiẓar, wagi d Mass Nurdin At Sliman. Yella-d ttiɛad-agi adelsan sendiḍelli n ssebt 13 deg waggur n yennayer 2018, deg taddart-is n Ubiẓar, s usentel-agi: “Yennayer. D aẓar, d tiɣri n tmazɣa”. Ma d ahil, yella-d akka, deg tsebḥit n wass, llant-d tnagiyin ɣef tudert-is d yimuhal-is, syin d ameslay fell-as sɣur yimeddukkal-is, yewwi-d daɣen kra n yisefra. Tella-d diɣ temsikent n wayen akk yexdem d wayen yettwarun fell-as.
Adaoun Abdelghani