Tuɣal tura d tisirit wansay-agi n lewziɛa neɣ timecret deg taddart n Tala Ɛetman, i ibeɛden ɣef Tizi Uzzu s wazal n 15 n yikilumitren.
Tettwakkes niqal tmecret-agi deg yiseggasen iɛeddan, ladɣa seg useggas n 1998, mi akken nɣan acennay Matub Lwennas. Syin akkin, rran-tt-id deg tazwara n yiseggasen n 2000. Acu kan ur tdum ara imi d-yeḍra, diɣ, wayen i d-yeḍran : Tafsut taberkant. Deg tlata n yiseggasen-agi ineggura, tekker taddart tarra-d ansay-agi i icudden s waṭas ɣer tgemmi taqbaylit s umata ugar n temsalt n ddin. Akka, dɣa, ara naf, tineggura-a, kkren-d kra yimṭurfa, bɣan ad tt-kksen. Qqaren-asen i yimezdaɣ n taddart belli lewziɛa-agi d’’leḥram, d lbidɛa’’. « Cwi kan drus yid-sen, yerna ur ǧǧhiden ara, wammag ad aɣ-agin ad nexdem timecret-agi. Ɛerden ad sluɣen tagnit, meɛna ur ssawḍen ara imi ur sɛin ara la lǧehd wala lḥeqq ». I d-yesmekta yiwen umezdaɣ n Tala Ɛetma, u yerna-d : « Nutni ur ttawin ara lewẓiɛa, ur ḥeddren ara deg yinejmuyaɛ n taddart ɣef wayen yerzan tamsalt-a. Limmer am nekk, tili aql-aɣ nessuffeɣ-iten deg ttufiq n taddart. Win ur neddi s wayen ɣef wayeg i temsefham tajmaɛt, i as-d-yeggran d aɛzal. Meɛna, teẓriḍ amek. Aql-aɣ akk d imawlan, yerna d iɛeggalen n tesqamut n taddart i d-izeggiren tikwal ». Akken yebɣu yili, tella-d tmecret, teḍra deg sser d liser, deg unecreḥ n yigerdan akked swab n yimeqqranen. Mlalen Wat taddart d agraw deg umraḥ ameqqran iwumi qqaren Abraḥ, ass-nni n lɛid, i wakken ad mɣafaren, ad qesren, ad d-awin kra n temsal tiqdimin gar-asen. Ladɣa, wid i d-yusan seg temdinin, wid ur nezdiɣ ara dinna. ‘’D ass yifen akk ussan’’, akken qqaren yimezwura, xas ulamma aṭas n tɣawsiwin ur rfident ara tsutwin-agi n tura. « Lɛid ɣer yimezwura mačči kan d aksum-nni ara ččen, meɛna d azalen-nni i tettawi tmecret deg yicuḍaḍ-is. Timecret, d tagmat, d anecraḥ, d asddukkel n wid yunneɣnan. D aseɛdel n wid yemɣunzan gar-asen. D asmekti n leɛwayed-nneɣ nekni s leqbayel. Dɣa, gar leɛwayed-nneɣ, ad naf anekcum n uqcict ɣer lewziɛa. Ass n tmecret, ad t-id-yawi baba-s neɣ yiwen seg twacult-is i wakken ad yawi iɣes. S lɛadda-agi ara t-issinen akk Wat taddart. Ad issinen isem-is akked yimawlan-is ». I d-yessefhem Dda Muḥend, ikemmel deg umezruy n lɛaddat « Syin mi yekcem ɣer lewziɛa, ssnent akk Wat taddart, ilaq ad t-issinen wiyaḍ, ladɣa imeddaukkal n baba-s. Ihi, mi meqqer ciṭ, ad t-awen ɣer ssuq, ad t-issinen yimsewqen, wid i yessnen baba-s, syin ad d-yaɣ aqerru. Qqaren-d i wakken ad iheggi iman-is, ad yuɣal d aqerru n uxxam. Asmi ara yaweḍ 18 n yiseggasen deg leɛmer-is, meḥsub yuɣal d argaz, ad yekcem ɣer tejmaɛt. Ad yuɣal d aɛeggal-is, ad d-yettak rray-is deg-s. Ha-t-an ihi kra n wansayen n tmurt n leqbayel asmi yal yiwen yesseḥbibir ɣef twacult-is. Asmi ttuɣalent wallen n umeẓyen sdat tid n umeqqran. Ihi, ‘’lecɣal n taddart, meqqrit, nekni meẓẓiyit’’, i as-qqaren Wat Zik ». Am wakka, dɣa, ay bɣan kra n yimezdaɣ ad tuɣal taddart-nsen. « Ad d-tuɣal tegmat, umsefham i yellan zik gar-asen. Nella d amedya gar tudrin, ass-a, wa ijebbed ɣer uyeffus, wayeḍ ɣer uẓelmaḍ », i d-yenna Dda Meẓyan. Ad d-nesmekti kan d akken taddart n Tala Ɛetman, llant-d snat n lewziɛat : yiwet deg taddart n Wadda, tayeḍ deg taddart n Ufella. Acu kan deg Taddart n Wadda, urǧin i d-yeḍra umgarad gar-asen. Xas ad d-yili kra, yettili-d d uffir, ur d-nettifrir, imi iferru uqbel ad ifiḍ. Ayen yelhan, yelha. ‘’Win ur nessin ad yels abernus-is, ad yessiked ɣer ɛemmi-s’’. Sya ar din, lɛid tameggazt i yal yiwen.
H. Moula