Ur yelli s lejhel neɣ s uqejjem! maca, iwulem ad d-nini d akken tiggrat-a, yal mi ara d-terzu tmettant, tettawi s tlata. Akka i teḍra tikkelt iɛeddan mi nerra timedlin i tlata yimdanen yettwassnen deg unnar n ccna d yidles : Djamel Allam, Abdellah Haman d Moulay Seddiki. Tikkelt-a daɣ, d Mohand Akli Haddadou amussnaw deg tesnilest, d aselmad deg tesdawit n Tizi Uzzu i teccelqef lmut, rnan ɣur-s sin n yinaẓuren : Sekkat Mohamed d Halli Ali. Ma yella Haddadou yenjer abrid n tira d usekfel n umezruy n tmaziɣt deg unnar ussnan d tmussni, Sekkat yessuzen imdanen s uẓawan ḥlawan. Ur yezmir ula yiwen ad yettu « Uh a Taninna » i ttawin yiḍebbalen deg tmeɣriwin neɣ tulawin s ucewwiq. Ma d Ali Halli, yeṣṣerṣa awal-is deg tezlit : Abernus, anda i d-yenna :
Yeǧǧa-yi-d jeddi abernus
Abernus i d-yeǧǧa baba-s
Yenna-d ḥader-it ɣef wammus
Ma yumes teɣli lqima-s
Fell-as ur ttakk afus
Ass-a, ulamma timedlin uɣalent ɣef tfekkiwin-nsen, tayeggirt-nni i zerɛen tfetti deg wakal, ad d-tefk ṣṣaba, ayen akk i leqmen yuɣ ad yegmu ad d-yefk igumma. D wa dɣa i d asirem-nsen, mi ara neḍfer abrid i d-nejren. D tagi kan i d tajmilt i ttrajun seg-neɣ. Gnet deg talwit
Smail. M