Aḥric wis 2
Ddan ayen ddan, lḥan ayen lḥan, wwḍen ɣer yiwet n taddart i d-yezgan γef yiwet n tiγilt. Tiγilt-nni thuski mačči d kra. Tiγalltin yakk i as-d-yezzin, ččuren-t d ijeğğigen. Ihi yenna-as Faskan, deg taddart-agi ahat tella talwit. Ruḥen ad nsen dinna. Ur d-yeγli ara yiḍ armi i slan i yiṣeggaden ttnnaγen γef yiddra n tsekkurt. Yal yiwen yeqqar-as d nekk i tt-id-yenγan. Yenna-as ihi taddart deg ttnnanγen medden γef tmenγiwt, ur telli d taddart deg tezdeγ talwit. Dγa yekker, yeffeγ seg taddart-nni. Ijeğğigen-nni yakk yellan γef tγalltin-nni, ddan yid-s. Nudan aṭas n tudrin-nniḍen i deg γillen tella talwit, ur tt-ufin ara. Dγa Faskan akked yijeğğigen yakk yeddan yid-s, nnuγnan aṭas. Yeqqim Faskan γef yiwen uẓru, yeqqim yettḥebbir, iẓri-s yeččur d imeṭṭi. Tusa-d tjeğğigt-nni tamecṭuḥt, tuẓa-d ɣer umeẓẓuγ-is, tenna-as: ‘’Teẓriḍ anda tella talwit? A-tt-an dihinna γef tqacuct n udrar-ihin’’. Yenna-as Faskan: ‘’Anwa i am-d-yennan?’’. Terra-as: ‘’D aḍu i yi-d-yennan’’. Yekker Faskan yeddem aεekkaz-is, yuli s adrar. Yettali yettali armi iεeddan nnig usigna. Imi yewweḍ ɣer tqacuct, ur yufi yiwen dinna. Tenna-as tjeğğigt-nni: ‘’Dagi, tella talwit’’. Yenna-as Faskan: ‘’A-t-an ulac imdanen’’. Tajeğğigt-nni terra-as: ‘’Telliḍ kečč’’. Dγa qqimen dinna. Zrin yiseggasen. Negren yakk yijeğğigen. Imdanen uγalen i wakken ad d-mmektin tallit i deg llan ijeğğigen γemmun timellalin s iniyen icebḥen, s uzegga&gamma,; s uwra&gamma,; akken ad mmaggent am tjeğğigin. Deg taddart n Faskan, tella yiwet n teqcict isem-is Tafsa. Tḥemmel ad tsell i yaya-s tettmeslay-as-d γef yijeğğigen. Tettales-as-d γef tallit n zik, imi llan ijeğğigen. Ihi yiwet tikkelt, testeqsa-tt: ‘’Anda rran akk yijeğğigen-agi i γef d tḥekkuḍ a yaya?’’. Dɣa, teḥka-as-d tamacahut n Faskan. Tenna-as Tafsa: ‘’Ad ruḥeγ ad nadiγ γef yijeğğigen-agi iγef i d-tettmeslayeḍ. Tenna-as yaya-s: ‘’Aha a yelli, ur yeẓri yiwen anda nnejlan neγ ahat negren maḍi !’’. Tenna-as Tafsa: ‘’Aniwer bγan rren, ad ten-id-afeγ’’. Ihi tekker Tafsa truḥ ad tnadi γef yijeğğigen anda llan. Taddart tettakk-itt i tayeḍ. Tetteddu testeqsay. Ulac. Llan wid yecfan γef Faskan iεedda-d syinna yegla s yijeğğigen yellan ikemmel abrid-is. LLan wid ur necfi ara. Almi tewweḍ ɣer uẓru-nni i γef yeqqim yiwet tikkelt Faskan yettḥebbir… Tettkemmil
Imyura.net