Yasmina i yettwassnen deg unnar n ccna s tezlatin yezzuzunen tasa, terna-d i yidles Amaziɣ yiwet n tesfift anda i d-tessekles 11 n tezlatin. Am yal tikelt, Yasmina teqqar-d s taɣect ɛlayen ayen akken i ttxemmiment s tuffra tulawin. Tesdukel awal d uẓawan, Timerǧa d lexyal beggnent-d ayen akken tettidir teqbaylit. «Imi ussan d yiseggasen zerrin, yif xir ad nexdem leqrar.» s wawal am wigi i tebda tasfift-is. Yasmina, terra lwelha-s daɣ ɣer tismin izedɣen amdan labeɛda di tayri. Di tezlit tis snat, tanaẓurt tger tiṭ ɣer deffir anda i d-temmekta ussan n lferḥ d lehna. Di tesfift-agi, Yasmina tennul ugar n tlufa i tettidir tmeṭṭut, imi di tezlit tis tlata tecna ɣef nndama imi teḍfer bu yir rray. Seg lefraq, tin iwumi qqaren “asawaḍ n tulawin” tecna ɣef lmut, imi tenna: “Mmelt-iyi ma d-yekker neɣ yejmed ɣef lluḥ.” D awalen igezzmen tigecrar, imi tin tḥuza taluft yecban ta, ad tt-teqqes tezlit-a. Dayen i tt-yeǧǧan tcebba lexbar-nni n lmut yeɣleb aḥlalas. Deg yiwen n uẓawan ideg tesseqdec aṭas n ttawilat, Yasmina tlum aṭas ɣef win ixedɛen abrid, anda i tewɛed ad t-tawi d acewwiq, iwakken ad t-ẓren medden, imi yeddan d lɛerc n tgezzant, yeǧǧa tazemmurt n lasel. Aya akk, ɣef yir leḥmala! “Ixf icebblen am taffa yegren s annar”, akka i s-tserreḥ i tezlit, tin akken ideg d-tbeggen ziɣ tezmer ad tbeddel, d aseɣres n leqyud. D agerruj iwumi i d-teḍleq Yasmina, s kra n teqbaylit n tjaddit, yal awal icudd ɣer gma-s, zzuɣuren idles Aqbayli. Tikelt-a, Yasmina terna aɛeqqa n lmelḥ i tesfift-is, imi snat n tezlatin tineggura d tajmilt i win akken yeɣlin d asfel ass n 25 di yunyu 1998. Tebda tizlit mi tenna: “Siḥ siḥ ay iẓri-w”. D tidet, d asalas i yeɣlin, imi tebded yes-s tmurt n Leqbayel, tin iɣef iḥureb s wawal d yiɣil. Xaḍen yimeslayen, imi tules-d tadyant akken i tella, d wamek yeɣli Lwennas. Tlum aṭas imi tɣab tdukli, ɣas akken ḍerrunt-d nugi ad necfu, iwakken ad terr tajmilt akken iwata s tezlit yettwassnen “Ayen Ayen”.
M. Smail