Ma drus nnig n ɛecṛa n yiseggasen aya ur d-yelli umuddu n yixxamen imettiyen s ɣuṛ uwanek (l’état) deg tɣiwant n Bgayet, ayen yeǧǧan imezdaɣ ad ṛǧun s ccuq amuddu n 1000 n yixxamen, ara d-yilin deg wussan-a ɣef akken i d-nnan srebes n uḥric teɛna temsalt. Ɣef ddema yella-d usbeddi n 15 tesquma n uḥtac deg unnar ɣef waddad (l’état) n yixxamen n yimsutar, u iban-d d akken muddent ṛṛabul nsent i tesqamut n ddayṛa, i d-yeǧǧan ḥaca 7424 n yisuturen seg 23000 yellan di tazwara. Lwali n Bgayet yenna i umaṭṭaf n Ṣṣumam « ḥaca wid yenkumren (yeḍṛuṛen) s tidet i wid ara d-ṣuḥen yixxamen-agi « , yenna daɣen « ɣas akken nezmer ad ncaṛeɛ s yisem n usaḍuf (lqanun) wid ur d-yennin tidet ɣef waddad n yixxamen-nsen maca, nsuref-asen, neḍfeṛ kan wid yeṭṛafikin lekwaɣeḍ-nsen « .
Tasqamut n ddayṛa deg wahil-is amenzu, ad tmud azal n 507 n yixxamen deg tama n Sidi Σli Lebḥeṛ, ma d wiyaḍ ad ten-tmud mi ara fakken lecɣal n yiberdan d yimṛaḥen, iqadusen n waman n tissit akked tzulixin… (VRD) di leḥwaṛi-nni. Ma d imdanen iwumi ara d-ṣuḥen yixxamen-agi, srabes n lwilaya nnan 85 % n leḥwaṛi i wid i ilulen deg tɣiwant n Bgayet, ayen i d-yegran i wid i ilulen deg tɣiwanin-nniḍen neɣ deg lwilayat-nniḍen, xerṣum kan zedɣen nnig n 5 n yiseggasen di Bgayet. Ɣas akken ahat yewɛeṛ ad mudden 1000 n yixxamen i 7424 n yimsutar, srabes teɛna temsalt qqaren-d dakken, ttheggin-d deg wahil nsen n 5 n yiseggasen i d-iteddun azal n 31500 n yixxamen deg lwilaya n Bgayet.
Farid Lahouari