Am yal aseggas, imḍebbren yeṭṭfen aḥric-agi n tezmert neɣ iwumi semman aḥric n tezdeg di tɣiwant n Tizi Wezzu, ffɣen-d ɣer yal amkan anda llan waman ladɣa wid-nni iḥebsen. Imekwan-agi i neẓra ččuren d infafaden d yivirusen, gellun-d s waṭas n lehlakat. « Tiɣiwanin ilaq fell-asent ad ḥadrent ɣef waman n yimezdaɣ,; le choléra akked d tawla typhoïde seg-sen i d-tekkent, aṭṭanen iwumi qqaren MTH meḥsub wid n waman » i d-yenna Djamal yiwen n ṭṭbib i yesnen mliḥ temsal-agi. Ma Chikhaoui Kamel, imḍebber n uḥric-agi n tezmert di tɣiwant n Tizi Wezzu yenna-d : « aql-aɣ nettεeddi ɣef yiɣerbazen, ɣef imekwan akk anda llan waman ; di temdint n Tizi Wezzu neɣ di tuddar i icudden ɣer tɣiwant-nneɣ,; nessuzur ddwa di yal amkan s ttawilat-agi ijdiden ; am wakken teẓram, aεdaw ameqqran, ahat, deg unebdu, d tizit. Ihi nekni nzeggir-as di tefsut mi ara yessefruruɣ di yibrir. » I usmekti kan, deg useggas n 2006, tella-d tmettant n sin yimdanen d lehlak n waṭas n yimezdaɣ n taddart n Tala Athmane ; ssebba n waya d iɣerdayen i yettawin yettarran deg wamus d waman mebla ma yella win i tecɣeb, di lweq-nni, temsalt.
Lhocine Ourezki