Tanmehla n yilemẓiyen d waddalen n twilayt Bgayet teddem rray ara d-iɛinen aṭas n medden. Tesnulfa-d yiwen umnir (guide) anda rsen yismawen, irmad, tansiwin d wuṭṭunen n tiliɣri n tdukliwin-a merra yellan deg twilayt n Bgayet. Ama d tid yettkelfen s waddal, neɣ d tidelsanin, neɣ timettiyin, neɣ d tid teɛna ddyana. Talɣa n umnir-a (15×21 cm), yella-d s 198 yisebtar. Daxel-is, taktabt tebḍa ɣef waṭas yeḥricen. Mi tekfa tezwart, yefruri-d wawal ɣef twilayt n Bgayet, ama ɣef yimeḍqan n uḥewwes, ama ɣef umezruy imziki neɣ amiran. Syin ɣer-s, yella-d usaḍuf (loi) 90/31 n 04 dujenber 1990 yeɛnan tidukliwin. Akken daɣen i llan iwellihen i wid d tid i ten-yuḥwaǧen. Seg usebter 39 armi d taggara, amnir yemmal-d s talɣa n tfelwa, ayen akk yeɛnan tidukla (isem n tidukla, isem n uselway, ass ideg i d-tlul, uṭṭun n trusi-ines deg usaḍuf, tansa) xersum, ayen yuḥwaǧ yiwen ad t-yissin ɣef tdukla, yezmer ad t-yaf deg umnir-a. Amnir-a n umussu n tdukliwin d ayen ara d-iselḥen nezzeh. Γer taggara n umnir, tura-d yiwet n tmedyazt n Abu Ɛali Ḥasen, anda i d-yenna “Ma d Nnasirya (isem n Bgayet n zik) ulac leɛbar-is deg tmura.”
Ait Ighil Mohand