I wakken ad nẓer amek i d-yella waya, neẓra Mass Ould Ali Lhadi, netta d anemhal n yidles n Tizi Wezzu am wakken daɣen d anemhal n uxxam n yidles Mulud Mεemri n temdint-a anda i d-ḍerrunt tmeɣriwin. Yenna-d : « D tanmehla n yidles n Tizi Wezzu s lemεawna n tneɣlaft n yidles i d-yesswejden leqdic-a. Ugar n 100 yicennayen, gar yiqdimen akked yijdiden, ara yilin deg waggur-agi n remḍan. Niqal timeɣriwen ttilint-d kan di tzeqqa n uxxam n yidles Mulud Mεemri, nwala dakken ur tettunefk ara tegnit i yal yiwen akken ad yekcem, imi tettaččar tzeqqa-agi. Ihi, nxemmem u nenna-as ssya d afella ad cnun ifennan-agi, ladɣa wid i d-yufraren, deg wannar Oukil Ramdane n temdint n Tizi Wezzu ? Γef waya ara cnun deg-s Allaoua, Nouara, Medjahed, Zehouania, Cheb Redouane, atg. Am wakken ad tili tejmilt i Yahiatène sɣur l’orchestre symphonique national. Rnu ɣef leqdic-a, llan-d wussan n tmezgunt si 27 ɣuct ar 3 ctember, i d-thegga tdukla tadelsant n At Bouaddou s lemεawna n tenmehla n uxxam n yidles. Ma d wid i d-irezzun ɣer tmeɣriwin-a, amur ameqqran deg-sen d ilmeẓyen, maca gtent twaculin imi llan iɣallen n laman i yettḥadaren fell-asent. Ma d ass n 27 di Remḍan, ad ilint azal n 20 n tmeɣriwin di lwilaya n Tizi Uzzu. »
… d tarawiḥ
I wakken ad nwali anda ttsehhiren yimdanen deg uḍan n remḍan, wid dɣa ur nettruḥ ɣer tmeɣriwin-a, nesteqsa rebεa deg-sen :
Nadir : nekk akken kan ara feṭreɣ,; d tazzla ɣer duminu akked terbaεt-iw, imi nesεa zher di lqahwa-nni ulac luṭu.
Rabah : nekk teɣli-yi timiṭ ɣef luṭu, si tesεa ar zzuğ d asrusu n yijiṭṭunen ɣef wuṭṭunen, acḥal tesεa cedda mi ara tεasseḍ,; d acu kan tikwal yella diɣ wurrif ma ur tt-teṭṭifeḍ ara. Ttarraɣ-tt kan i ubeddel ikarṭunen. Nekni ihi nesεa zher d ameqqran imi ur nxesser ara aṭas n yidrimen, ḥnin yidneɣ Hamid mačči am leqhawi-nniḍen anda xessren alamma d 3000 idinaren i yiḍ.
Yuba : nekni nettemlili-d d tarbaɛt yal iḍ ɣer yiwen umkan, nettqessir ɣef umaynut i d-yellan. Tikwal nrezzu ɣer yimawlan ad ten-id-nẓer, xas ulamma lεada-agi tebda tettenqas gar yimdanen, ma ulac aql-aɣ da ; anda nufeg i ners.
Mokrane : nekk ttruḥuɣ srid ɣer tarawiḥ,; ḥemmleɣ aya dayen kan. D wa i irennun sser i wuḍan n remḍan, nettbeddil ula d imekwan ; nettruḥu s lğameε ɣer wayeḍ.
Lhocine Ourezki