Ussan-a, tuget n yinelmaden n tesdawit n Bgayet letthan akked ujerred n yiman-nsen deg wahil n Lottery 2011 i d-ixeddem yal aseggas udabu n tmurt n Marikan s ttawil n lantinet. Leqhawi akk n lantirnet i d-iqerben ɣer yimezduɣen n yinelmaden, εemrent ussan-a s wid i yettjerriden iman-nsen. Wid yeṭṭfen leqhawi-ya, tiswiεin ttεawanen imectariyen-nsen deg ujerred ladɣa wid ur nessin ara tutlayt tagnizit i s ileḥḥu lsit-nni, neɣ amek ilaq ad tili tteswira i iteddun deg ujerred. Aya mebɣir wid yettjerriden iman-nsen deg yimukan n lantirnet yellan deg tesdawit ama deg Budaw neɣ di Targa-Uzemmur.
Ajerred-a d win yebdan seg wass n 2 tuber, taggara-s ad tili ass n 30 unbir. Imi aṭas i yesseḥmacen ad inigen ɣer umaḍal amaynut, ad nefk lsit n tidet : http://www.dvlottery.state.gov, acku llan wid n lekdeb.
Mokrane Chikhi