Ugur ameqqran i tettidir lwilaya n Tizi-Wezzu deg yiseggasen-agi ineggura d win n wammus ; 9000 yiqenṭaren n yiḍumman i d-yettefɣen seg yixxamen yal ass. Γef wakken i d-nnan yimḍebren, llan sin n wuguren di temsalt-a : ugur n ulqaḍ n yiḍumman akked d wanda n uḍegger-nsen. Ma neẓra dakken tamurt n Leqbayel amur ameqqran n yimeẓdaɣ llan di tuddar – 2500 n tuddart i yellan di lwilaya n Tizi-Wezzu – d nettat, daɣen, i yeṭṭfen amḍiq amezwaru di tmurt n Lezzayer akked d Tefriqt di tneẓẓi (densité) s 500 yimezdaɣ/kilumiter ; ayagi akk dayen yesweεren axeddim deg uḥric-a daymi, diɣ,; ṭṭuqqten yimekwan n uḍegger n yiḍumman di yal amḍiq mebla aḥezzeb (1219 yigudiyen). Di lwilaya n Tizi-Wezzu ttwaheggan kan 4 yimekwan s wudem unṣib i unejmuε n yiḍumman. Ɛlaḥsab n yimḍebbren, d imezdaɣ i yettagin ad yili di tama-nsen umkan i yifrasen-a.
Ussan-agi ineggura, kkrent-d kra tdukliwin yettḥaraben ɣef ugama akken ad sduklent iɣallen-nsent u ad siğğhident amennuɣ akken ad d-fkent kra tmuɣliwin i izemren ad ililnt d tifrat i twaɣit-a. Γef wanect-a ihi, tella-d yiwet n temlilit ass 7 deg waggur-agi ideg i nella uɣur i d-tessawel tdukla (AJIE) ; temlilit-a tesdukkel-d rebεa n tdukliwin-nniḍen : SEVE, AEI, APE akked TEZDEG. Deg yiwen n wulɣu i d-ssufɣent tdukliwin-a, ssawlent-d i tdukliwin i iqeddcen deg uḥric-a akken ad walint amek ara ttmeslayent sya d afella s yiwen n umeslay. Ma gar tifrat ɣef wayeg ttweṣṣint tdukliwin-a, nezmer ad d-nader : afran n yiḍumman ; meḥsub yal ṣṣenf n yiḍumman ad t-rren weḥd-s akked uxlaq n tkebbaniyin ara d-yelhun i ccɣel-a. “Ammus d tamsalt yeεnan akk medden, ilaq ad iḥas yal yiwen yis-s”, i d-nnan yimḍebbren n tdukliwin-a.
Lhocine Ourezki