Taddart La Crête-Rouge i d-yezgan di tɣiwant n El-Adjiba tessaweḍ ad tesɛu yiwet n temkerḍit iwumi teldi tibbura taggara n yimalas yezrin. Yella-d waya s lǧehd n yiɛeggalen n tiddukla tadelsant « Tadukli » i yessawḍen ad sbedden yiwen seg yisenfaren nsen. Ilaq ad d-nebder d akken « Tadukli » terbeḥ anda akken xesren wiyaḍ. Amek ihi ur d-neqqar ara aya, imi di tɣiwanin neɣ ahat di twilayin s lekmal timkerḍin medlent tebbura-nsent, taddart tesbedd tamkerḍit s lqella n ttawilat. Iwakken ad ssiwḍen yiɛeggalen n tdukli-agi ɣer lebɣi-nsen, ssutren afus n lemɛawna deg yiwet n tejmaɛt iqeddcen ilmend n warrac imeẓyanen iwumi semman « Joussour ». Wid yellan di tejmaɛt-a, i nemmugar dɣa di temkerḍit-a tamaynut teddun s yiwen n wahil ara iɛawnen arrac d yilmeẓyen di tmusni daxel n tdukliwin. S tidet, fkan-d afus n tallelt s wazal n 8 n yiselkimen (micro-ordinateurs) d kara n tɣawsiwin nniḍen. D ayen yeǧǧan “Tadukli” tger tiɣri i yiwet n tselmadt ara yeslemden arrac imeẓyanen amek ara sxedmen allalen-a. Di tama nniḍen, tettuhegga yiwet n tzeqqa n tɣuri, anda inelmaden tettunefk-asen tegnit ad gren tiṭ ɣer waṭas n yidlisen ahat ad aɣen tanumi ɣer tɣuri. Ad d-nesmekti kan, mi teldi temkerḍit-a tibbura-s, ḥeḍen waṭas n yimdanen deg-sen imḍebbren n tɣiwant n Leɛǧiba, kra n yimezdaɣ n taddart d wid i d-yefkan afus n lemɛawna I usenfar-a.
M. Smail