Accueil Tamazight Igerdan n “berra zwaǧ”

Igerdan n “berra zwaǧ”

1999
- PUBLICITÉ -

Ass umenzu di yunyu yettuneḥsab d ass agreɣlan n yigerdan, ɣas akken deg tilawt sɛan sin n yizmaz (dates) deg useggas, amezwaru d wagi i d-nebder akka tesnulfa-t-id tfidiṛalit tegdudant tegreɣlant n tlawin (FDIF) deg agur n unbir 1949 di tmurt n Rrus, ma d wayeḍ d ass n 20 deg unbir i yellan d ass agreɣlan n yizerfan n ugrud i d-tesnulfa tuddsa n tmura yedduklen (ONU) deg dujember 1954. Ɣef ddema n usmekti-agi neɛreḍ ad d-nsuk tiṭ ɣef temsalt n yigerdan ur yesɛin ara tawacult neɣ wid yettudegṛen imi i d-lulen beṛṛa i jwaj (zwaǧ) ma nezmer ad sen-nsemmi akka, acku deg yiseggasen-agi ineggura llan wazal n 29000 di tmurt-nneɣ, 4000 kan deg-sen i jemɛent tyemmatin-nsen neɣ ḥed si twacult-nsen; srabes n tneɣlaft n temsetla (solidarité) nnan-d dakken azal n 3000 n yigerdan i d-yettlalen i useggas beṛṛa i zwaǧ, ma d-tidukliwin teɛna temsalt qqaṛent-d ma drus llan 6000 igerdan. Ayen yeṭfen lwelha deg annect-a d asuter i yettnernin seg ass ɣer wass n twaculin n yiminigen izzayriyen i yebɣan ad sekren (ad ṛebbin) igerdan-agi, imi ɣef leḥsab n tneɣlaft teɛna temsalt llan yakan armi d taggara n useggas 2010 ma drus 2000 n yimeẓyanen i d-ḥudden iminigen-a, ɣas akken aṭas n yiɛewwiqen d wuguren n lekwaɣeḍ i d-ttmagaren, rnu ɣer ɣur-s, ger ṛwaḥ d tuɣalin, tikwal laqen 3 n yiseggasen akken ad wejden lekwaɣeḍ idebliyen (documents administratifs). Maca anect-a meṛṛa d ulac ma nmuqel ɣer wugur ameqṛan ara d-afen di temɣeṛ-nsen igerdan-a, acku di temsalt-agi, isuḍaf (lois) n tmurt-nneɣ d wid n tmura ideg ttidiren iminigen-a (tuget deg-sent n Luṛup) mgaraden. Xas akka, ayen i yessefṛaḥen d asuter i yettnernin ɣef yigerdan-agi imi d luluf n yiminigen i yettṛaǧun s ccuq amer ahat ad sen-d-iṣaḥ yiwen upupun, wagi si tama, si tama-nniḍen assirem-nsen muqqeṛ deg tadbelt n tmura anda ttidiren yal ass iwakken ad ten-teǧ ad mudden nnkawi-nsen i warrac-agi…Tameɣṛa igerrzen d tudert zeddigen, ɣezzifen i warrac-nneɣ meṛṛa; yeqqim-d kan ad nini s umata dakken agdud ara yeṭfen afus i yigerdan-is d agdud ara yidiren aṭas.

- PUBLICITÉ -

Farid Lahouari

- PUBLICITÉ -