Accueil Tamazight Aẓar yeṭṭafar tara n Ḥusin Ḥaǧam

Ajdid deg tira

Aẓar yeṭṭafar tara n Ḥusin Ḥaǧam

17

Tamedyazt, ur tesɛi leɛmer, ur tettcawar. Ur teǧǧa amɣar wala aterras, terna tegla ula s yilemẓi. Ddurt iɛeddan, i d-ilul yiwen udlis-nniḍen n tmedyazt i d-yewwin ɣef ddeqs n yisental d tmuɣliwin. “Aẓar yeṭṭafar tara”, d ammud n tmedyazt amenzu n umedyaz ilemẓi Ḥusin Ḥaǧam. D adlis bu 64 n yisebtar, llan deg-s 29 n yisefra. Yettnuzu deg tnedlisin s wazal n 200 DA, yeffeɣ-d ɣer tezrigin Ccix Muḥend u Lḥusin n Tizi Uzzu.

Win ara iḍillen ɣer daxel-is, ad t-id-tqabel tezwert n umedyaz Mbarek Gemmar. Syin ad yekcem di lebḥer n yisefra, wa ad d-ijbed wayeḍ, ur t-yesrusu alamma yekfa-t s tɣuri, imi icudd am sensela. Gar yisental, ara d-imager yimeɣri n wammud-a, ad naf isefra ɣef tmeṭṭut, isefra ɣef 08 meɣres i yellan ass agraɣlan n tmeṭṭut. Yessefra diɣ ɣef tmaziɣt akked timmuzɣa, yerra diɣen tijmilin i yirgazen-agi n teqbaylit imeqqranen: Sliman Ɛazem d Muḥya. Tettban-d timanit n umedyaz-agi amecṭuḥ deg tira-s, acku yessefra ɣef waddal imi netta d anaddal, yura diɣ asefru ɣef tudert n umedyaz, ideg i d-yemla i medden amek yettwali win i t-yecban; win tezdeɣ tmedyazt.

Mi ara tettiḍ isebtar n udlis-a, gar yizwal ara d-ijebden lwelha-k d wigi: Aceqqiq di tegmat, Tilelli, 20 di yebrir n 1980, JSK, Lweqt amessas, adlis ideg i d-as yerra tajmilt, dɣa yenna-as :
Ɣer adlis deg-s ad tlemdeḍ
Lebɣi-k ɣur-s ad tawḍeḍ
Tudert-ik ad as-lhun wussan (…)
Ḥusin Ḥaǧam, ulamma meẓẓi di leɛmer maca leqdic-is adelsan yugar-it. D ilemẓi n 14 n yiseggasen kan di leɛmer-is, meɛna d amɣar azemni deg wawal akked tmedyazt. Ilul ass n 10 yunyu 2005 di taddart n At Ṣellan, taɣiwant n Uqbil, di Micli. Isurifen-is imenza deg tmedyazt, bdan deg useggas n 2016, asmi yella yeqqar deg useggas wis 5 n ulmud amenzu. Iḥella-d arraz wis sin n tfaska n tmedyazt timezdit deg useggas-a n 2019, i d-thegga tddukkla Taflest n Tizi Uzzu. D yiwen n yilemẓi yeččuren d tabɣest d lebɣi, yettekki deg waṭas n lqidicat idelsanen, yal mi ara as-tettunefk tegnit i waya.

D yiwen umedyaz amecṭuḥ, i iqedcen d waṭas n yizamulen n teqbaylit: Yidir, At Mengellat, Ɛellawa…atg. Afud igerrzen i umeskar d umecwar ɣezzifen deg uḥric-a n tẓuri s umata.

Adaoun Ghani