Ttkemmilen wussan idelsanen deg temdint n Wehran, imi yal akud s wanaw adelsan i as-iwulmen. D timezgunin, d isaragen, d isura n ssinima…, i d-ttheggint waṭas n tddukkliwin i iqeddcen ɣef lecɣal-agi, ladɣa tiddukkliwin tidelsanin i yellan deg tlemmsat n temdint. Tallit ideg i nella d Remḍan, tuget n yixeddamen senɣasen seg uxeddim, rnu azɣal i d-yettilin deg uzal. Maca deg yiḍ mi fetren yimdanen, aṭas n leqdic i d-yettilin sɣur tiddukkliwin-a iseg i d-nezwar. D ayen i yeǧǧan iɛeggalen n tddukkla Bel Horizon i d-yezgan deg uzniq n Lɛerbi Ben Mhidi ad farsen tagnit-a n remḍan, u ad d-heggin tidwilin i usenɛet n yisura d yiskasiyen ara d-yettilin ar taggara n yal asaru s ubeddel n tmuɣli gar yimferǧen.
Tefren tddukkla-a ukkuẓ n yisura ɣef teɣzi n waggur n Remḍan, yal imalas ad d-yili yiwen, ma d ass i textar d ass n lǧemɛa ɣef 22h n yiḍ deg wammas n tiddukkla. Yebda wahil lǧemɛa yezrin, 10 mayu, s usaru Z n Costa-Gavras (1969). Asaru wis sin ad d-yili deg wass n lǧemɛa-ya sdat-neɣ, d asaru n Merzak Allouache Bab El-Oued City (1993). Ad ikemmel wahil deg yimalas wis kraḍ, ass n, 24 mayu, s usaru Wadjda n Haifaa Al Mansour (2012). Ma d asaru aneggaru, yetturaǧu ad d-yettwasenɛet ass n lǧemɛa taneggarut n Remḍan, 31 mayu, s usentel n “Carnaval fi Dachra” n Mohamed Oukassi (1994).
Khaled Achoui