Ɣef wakken i d-yenna ussan-a yezrin uneɣlaf n umahil, n useqdec n tɣellist tinmettit, Mass Ḥasan Teǧǧani Haddam, ad yili kra n ubeddel deg uɣram (Remboursement) n yisɛeddiyen insnujjyanen. Yenna-d aya deg wawal-is i d-yefka i tɣamsa di tama n Galma, i lmend n tirza i t-yewwin ɣer din imi, akken i d-iberreḥ, ttheggin deg ugezdu-is i usemres n sswami-a timaynutin akken ad ḍemnen aqɛad n tedrimt n Yisenduqen n ṭṭmana tinmettit.Yerna-d daɣen d akken ssuma n uɣram n yisɛeddiyen isnujjyanen ɣur yimsujjiyen imatuyen d wuzzigen « yeǧǧa-tt wakud acku tettuɣal i yiseggasen n 1980 », am wakken i d-yessegza belli ad d-yeḍru uɛiwed n tmuɣli ɣef sswami n uɣram akken ad tezg akked tzemmar tidrimanin n Yisenduqen n ṭṭmana tinmettit. Rnu ɣer waya, ɣef wakken i d-yenna dima, yewwi-d ad d-yili uɛiwed-a n tmuɣli n uɣram ɣef leḥsab n wannect i d-sqamen yisɛeddiyen ɣur ṭṭebbat.
Seld ameslay-a ɣef « wuguren » n tedrimt n Yisenduqen n ṭṭmana tinmettit, aṭas n yimdanen i yettmesteqsayen si tura amek ara yili ubeddel-a, abeɛda igellilen seg-sen. «Nessaram d ayen ara yilin ɣef leḥsab n tdamsa n yal axxam d liḥala tinmettit n yal tawacult. Acku ma yella amek ara yili uɣram n win irekden si tama n tedrimt ara yili ɣef uẓawali, dinna d ugur, d lbaṭṭel ameqqran », i d-yenna yiwen n uɣerman si Bgayet. Ad d-nesmekti ɣer taggara, d akken yebder-d uneɣlaf aheggi, deg wakuden i d-iteddun, n temliliyin ɣef tɣellist tinmettit akken ad yettwaldi uskasi azedgan ɣef taluft-a gar waṭas n tamiwin, akken ad suffɣen ɣer yisumar n tifrat yelhan, syinna ad ttwaseknen i snat n texxamin n uparlaman, APN d Sénat.
M. K.