Accueil Tamazight Afellaḥ d mmi-s

Cwiṭ seg tmucuha n leqbayel

Afellaḥ d mmi-s

285

Yella yiwen n urgaz d afellaḥ, ala tamussni i d rraṣ lmal-is, maca nnif d lḥerma d agerruj, iγef yesseḥbibir nezzeh. Ihi yiwen wass, yennuγ d tmeṭṭut-is armi i t-tluqeb, tenna-as: “Lukan sεiγ zzher, nekk seg uxxam n wid iyeɣran, ur ttaγeγ ara afellaḥ, leεmer yekcim aγerbaz. Atmaten-iw d At leqlam γef umeẓẓuγ.


Mi yesla ufellaḥ lehduṛ-agi, yettwajreḥ, acku yeẓra sani rran. Yenna-as: “Ihi imi ttwaḥqqreγ akk, ad truḥeḍ tura γer uxxam-nwen, ad ten-testeqsiḍ γef wayen yakk ara awen-iniγ. Ma ur d-tewwiḍ ara tiririt iseḥḥan, ad tt-uγaleḍ, acku win yeγran mačči d nekkini. Tenna-as: “Bbuh, ur yelli usteqsi iwumi ur sεin watmaten-iw tiririt”. Yenna-as: “Ina-sen acu i yerẓagen di ddunit ? D acu i iẓiḍen di ddunit?” Tenna-as: “Ah d aya, tura ara ruḥeγ». Mmi-tsen la d-issel i wayen ara iḍeṛṛun, yeḥsa yemma-s ur d-tettawi tiririt ilaqen, yessen baba-s d bu lemεun, xwal-is d at-zzux n baṭel, yugad γef yemma-s. Yeffeγ si ṭṭaq n taεrict, yezwar s abrid ad iqabel yemma-s. Yemlal yid-s mi tleḥḥu, yenna-as: “A Yemma tewwiḍ-d tiririt?”
Tenna-as: “Maεlum”.
-Acu-tt?
-I iẓiḍen d tament, i irẓagen d qeḍṛan. Dγa yewwet anyir-is, yenna-as: ‘Acu i yiğğan, zwareγ-am-d s abrid”.
Tenna-as:-Ayγer? Yenna-as: “Lemmer ad isel i tiririt-a, ad am-yebḍu aqerru. Ma tebγiḍ ad tkemmleḍ ussan-im yid-neγ, ini-as : “terẓeg d cceṛ, tiẓedt d lxiṛ”. Yuγal mi i tewweḍ s axxam, yenna-as urgaz-is: “Amek ihi ?”
Tenna-yas: “Ad ak-qarren i yerẓagen d cceṛ, i iẓiden d lxiṛ”. Argaz mi i yesla i tririt yuzzel srid ɣer tγurfet, yufa-n mmi-s ulac-it, yefhem tamsalt. Iruḥ-d s azniq, yaf mmi-s di beṛṛa, yenna-as: “I mi tselkeḍ wiyaḍ, sellek tura iman-ik”.
Baba-s: “Acu i iγelben times ?”
Mmi-s: “D aman”.
-Acu i iγelben aman ?
-D asawen.
-D acu i iγelben asawen ?
-D lxil.
-D acu i iγelben lxil ?
-D argaz.
-D acu i iγelben argaz ?
-D tameṭṭut.
-Ihi a mmi, tura mi i ak-ẓriγ d uḥdiq ad ak-weṣṣiγ.
-Anεam a baba?
-Ur xeddem d leḥkem ijuṛen, ur ttawi ṭlaba umectaq, ur mmal lbaḍna i tmeṭṭut.
-Ad ak-yeεfu Ṛebbi.
Yahia Yanes