Akken yella lḥal deg yakk timura n ddunit, isɣuren iɣurbizen (établissements scolaires) zgan d amḍiq ideg yettidir udlis s umata. S tallelt n uwanek i yettakken i tdeblin tadrimt beddemma i tiɣin n yidlisen, ad naf deg yal asɣur aɣurbiz ( aɣerbaz amenzu, alemmas, tasnawit, tasdawit, atg) tamkarḍit i yettwasbedden i umager n yidlisen. Maca seg yidlisen i tent-yeččarayen, yaḍra anwi iwumi d-tsaḥ nnuba tageɛmirt? Neɣ anwi idlisen i d-ttaɣen s waṭas yisɣuren-a?
Nesteqsa yiwen i iqerben i yiwet n tesnawit deg usamar n Bgayet, ha-t-a wacu i aɣ-d-yenna: « Ilaq ad nẓer d akken ayen i d-ttawin yisɣuren itteddun ɣef leḥsab n wayen i yesɣaray neɣ n wayen i yesɛa d tangiwin. Dɣa, imi taqbaylit d tanga kan, meḥsub mačči d tutlayt n uselmed, drus maḍi i tesɛa d amur di temkarḍit. Llan kra n yinemhalen i irennun ttaɣen-d s temmeɣnest kan, maca ur llin ara aṭas ». Nesteqsa daɣen at teẓrigin, iban-aɣ-d am wakken ur yesɛi udlis aqbayli azal ɣur yimḍebbren n yisɣuren.
« Nekk ar tura urɛad uɣen yisɣuren idlisen seg teẓrigin-nneɣ. Nessuter kra seg-sen, maca amzun smeɛdzen ad aɣen adlis aqbayli », i aɣ-d-yenna yiwen n umaẓrag si Tizi Uzzu. Nenced di Bgayet amaẓrag-nniḍen ur nesɛi aṭas-aya segmi yebda, yenna-aɣ-d belli d tiɣiwanin i yebɣan ad awint sɣur-s: « A-t-an ttheyyiɣ-d kra n yidlisen ad ten-awiɣ i kra n tɣiwanin i yi-ten-id-yessutren. Isɣuren iɣurbizen ur d-seknen ar tura nniya yesfan i tiɣin », i d-iberreḥ. Iban-aɣ-d ihi ur ttaɣen s waṭas yisɣuren iɣurbizen adlis aqbayli n yigerdan neɣ n yimeqqranen, akken ttaɣen idlisen i yuran s tutlayin-nniḍen.
M. K.