Accueil Tamazight Anti i d tifrat i yiberdan n Uneqquc?

Tasexriwt

Anti i d tifrat i yiberdan n Uneqquc?

11

Teɣzi n tegrest-a, am yal tagrest dɣa, sɛeddan-tt yinehharen n tɣiwanin n Tsexriwt d Ayt Smaɛel deg teqlaq d tugdi. Aya imi abrid i ten-yettawin tasebḥit i ten-id-yettarran tameddit, ulac akk deg-s taɣellist i ilaqen ad tili deg yal abrid. Ayen i d-yettilin deg-s, d isyaxen n yal ccetwa, yeǧǧa at tkeryas ttkukrun ad t-sqedcen, imi tezga deg-s tudert-nsen deg umihi.

Seg tikkelt iɛeddan, asmi yeɣli umur ameqqran seg ubrid-nni deg yiwen n umkan, ur yerkid s wudem yelhan wakal n temnaḍt-a. Ass-nni, teḥbes din tikli kra n wussan, ttɛeddayen yinehharen n Ayt Smaɛel di leɛḍil seg taddart n Rrif, armi i t-id-terra yiwet n termist yezmer ad yettwaseqdec. Aseggas-a dɣa, ɣas tuɣ yettwaččur yilem n ubrid isaxen, yuɣal yelḥa wakal-nni tikkelt-nniḍen, iga-d aceqqiq di tlemmast n ubrid, rnu mačči ḥaca deg yiwen n umḍiq.

D ayen i yernan yewwi-d ugar n tugdi d unezgum i yiseqdacen n ubrid-a awilay wis 06. « Akk akal n temnaḍt-nni itteddu kra kra. Nwala yal aseggas ad yernu ad iḥerrek cwiṭ, abeɛda deg tsemhuyt n tesmuḍi d yigeffuren ideg ṭṭuqquten waman », i d-yenna yiwen n unehhar n Ayt Smaɛel. Ɣur yimḍebbren n tɣiwanin uɣur yeqqen ubrid-a, Tasexriwt d Ayt Smaɛel, ur sɛin ar tura tifrat-nniḍen i ubrid-a yettseyyixen, ala aččar d ureqqeɛ-ines yal mi ara yelḥu neɣ izuq. Ulamma ɣur tuget n yiɣermanen, ur ilaq ara attkel kan ɣef ubrid-a ayiwen, imi yezmer ad iruḥ akkit ass-a neɣ azekka.

« Ttwaliɣ, yewwi-d ad nwali amek ara nexdem abrid-nniḍen d amaynut ara yilin d amsellek sya ɣer sdat. Abrid-a aqbur, ma kemmlen yiseyyaxen deg-s, ur yettdumu ara aṭas n yiseggasen », d awal n yiwen n umezdaɣ n tama n Unẓul-asamar n Bgayet.

M. K.