Ass-nni n lexmis, 05 deg unbir 2020, i temmut yemma-s n Matoub Lounes deg sbiṭer n Fransa. Nna Ɛelǧiya, akken i yuɣen tannumi ssawalen-as yimdanen, tella tuḍen aṭas-aya. Amur ameqqran n wakud n yiseggasen n 2019 akked wayen iɛeddan seg 2020, tesɛedda-t d tamuḍint deg sbiṭer. Tlul deg taddart n Tewrirt Musa deg useggas n 1931. D mmi-s n yelli-s Asirem i d-yefkan s wudem unṣib isalli n tmettant-is deg uɣrab-is n Facebook. ‘’S leḥzen ameqqran ara awen-ssiwḍeɣ isalli n tmettant n setti Nna Ɛelǧiya Matoub, i yemmuten sbeḥ-agi deg temdint n Pari’’, i d-yura. Ikemmel, yenna : ‘’Tella d amedya n tebɣest. Ha-tt-an terniḍ ɣer mmi-m i tejmaḍ aṭas. Gen deg talwit’’. Tban-d yemma-s n Matoub s annar seg wasmi nnɣan mmi-s ass n, 25 deg yunyu 1998, deg Tala Bounan. Seg wass-nni i tettnadi ɣef wid i t-yenɣan. 22 d aseggas, nettat d anadi ɣef tidet n tmenɣiwt-is. Am wakka, ha-tt-an tɣab, ur tufi tiririt i yisteqsiyen-is.
Xas ulamma tuḍen, meɛna urǧin tebra i ṭṭbel deg waman deg temsalt n tsestant ɣef wid ineqqḍen tudert i mmi-s. Temmeslay fell-as deg yisaragen, deg yiɣmisen, deg tilivizyuwat. Tezga d acetki deg uxxam n ccreɛ nettat d yelli-s Malika akked wid merra iḥemmlen aɣewwaɣ (rebelle). Tella tettedir kan i tidet ɣef tmenɣiwt n mmi-s Lounes. Tessaram ad d-tban, syin wicqa ma temmut. Acu kan, ddunit, tbeddel rray, tewwi-tt uqbel ad d-yeḍru usirem-is. Ugar n sin n yiseggasen-ya segmi tesenqes tisin ɣer taddart imi tuḍen mliḥ u tezga deg sbiṭer. Uqbel aṭṭan-is, tḥemmel ad temlil deg uxxam-is n Tewrirt akked wid i d-irezzun ɣer din, ladɣa deg unebdu, yal 25 deg yunyu.
Tezga ɣer tama n mmi-s
Aṭas n temliliyin akked tmeɣriwin n Matoub Lounes i deg-i teḥḍer Aldjia Matoub, tezga tetteddu yid-s armi i tt-cebban ɣer yemma-s n Loucif Hamani imi ula d nettat, tetteddu ɣer temliliyin n mmi-s. Nna Ɛelǧiya, d tamdyazt, d tacennayt ifazen. Akka dɣa i tecna yiwen seg icewwiqen-is deg walbum ‘’Asirem’’ i d-yeffɣen deg useggas n 1996. Temḍel iḍelli n lḥdd deg taddart-is, Tawrirt Musa Waɛmer, sdat n wayendin n yimdanen. Sgunfu deg talwit.
Hocine Moula