Ass-nni n larebɣa iɛeddan i tefka tesbeddit Tiregwa i iqeddcen deg Kanada arrazen Rachid Alliche n tullist akked warraz n Belaid Ait Ali n wungal. Yeḍra-a waya deg uxxam n yisaragen n tɣiwant n Bgayet sdat n waṭas n yinebgawen i d-tenced tuddsa-agi i yerran idles d tutlayt n tmaziɣt d ahil-is.
I lmend n waya, ḥedren ihi, ayendin n yibaẓuren, imyura akked yimussnawen yecban Allaoua Rabhi, Kamel Bouamara, Aomer Oulamara, Ahmed Nekkar, Zidane Yacine, Ali Belhot d wiyaḍ. Deg wawal-nsen, smektan-d yiɛeggalen n tsebeddit Tiregwa amecwar n tuddsa-agi i yebdan leqdic-is deg useggas deg useggas n 2012 deg tmurt n Kanada. Leqdic i yeɛnan asnerni akked tneflit n tutlayt tamaziɣt s umata.
Xas ulamma leqdic ameqqran yerza tameslayt taqbaylit imi dɣa arrazen n tullist d wungal cudden ɣer yimyura iqbayliyen, Rachid Alliche akked Belaid Ait Ali, meɛna ad d-ilin sya d afella warrazen i tmeslayin-nniḍen n tmaziɣt, ɣef wakken i t-id-iwekked Rachid At Ali Oukaci. “Aql-aɣ la nettwali amek ara d-nernu arrazen i tutlayin-nniḍen n tmaziɣt, ama dagi deg Lezzayer i tcawit neɣ deg Merruk.
Nezmer ad as-nefk isem Arraz Kateb Yacine ɣer yicawiyen, arraz Ali Azaytoune deg tmurt n Merruk”. I usmekti, tikkelt-a, ufraren-d 3 n yimyura deg warraz n tullist i yettuɣalen d tajmilt i Belaid Ait Ali, wigi d: Djilali Haddouche s tullist «Azabuq» ; Thiziri Taib s tullist «Tabrat i talsa» akked Lyes Belaidi s tullist «Ṣayddu Mayga». Ma yella d arraz Rachid Alliche, yuɣal aseggas-agi i umyaru Sidali Lahdir s wungal-is «Tirga n wul» i d-yeffɣen seg teẓrigin Tafat.
Hocine Moula