Accueil Tamazight ‘’Aseggas-a, nxus tadrimt. Ula d Aseqqamu Aɣerfan n Tizi Uzzu ur aɣ-iɛawen...

Smail Boukherroub, aselway n Useqqamu aɣerfan n Bujimaɛ

‘’Aseggas-a, nxus tadrimt. Ula d Aseqqamu Aɣerfan n Tizi Uzzu ur aɣ-iɛawen ara.’’

130

Aɣmis n yimaziɣen : Acu ara d-tiniḍ ɣef Tezrigt tis 6 n udlis n useggas-a ?
Smail Boukheroub : D ayen yessefraḥen imi i d-nuɣal. Nɣab azal n sin n yiseggasen s ssebba n waṭṭan n Covid-19, ahat llan wid i as-yennan dayen ttun adlis neɣ ttunaɣ ɛad nekni. Assa, nwal udem igerrzen i yifkan yimdanen i tezrigt-agi : yemmar-d lɣaci sya u sya. Ussan n yal tiɣmert n tmur, mačči kan s leqraba-agi. Usan-d seg Bumerdas, Bgayet, Tubiret, Sṭif, Lezzayer tamanaɣt, Wehran…atg. Aya, yefka-aɣ-d afud i wakken ad nkemmel xas ulamma tazrigt-agi, tella xir n tid iɛeddan. Nerna-d imekwan n temsikniyin akked wid iḥeḍren, ama d imyura neɣ tizrigin. Rnu ɣer-s, ayen i d-yusan seg lebɛid d wayen i d-yusan s leqreb, qrib kif kif.

Acu n umgarad i yellan gar tezrigt n useggas-a akked tin n yilindi ?
 Yella ujdid deg yisental iɣef bnan yisaragen : wwi-d awal ɣef tmetti s umata, ɣef tɣɣermi (citoyenneté). Dayen yeǧǧan imdanen ad ilin s waṭas u ad ḥeḍren s waṭas i yisaragen i d-yellan dagi.

Llan kra n yimdanen mgal tinnubga n kra n yimyura i d-necdem ɣer yisaragen. Nnan-t-id, ladɣa, s ttawil n Internet. Acu ara asen-tiniḍ ?
 Nekni ur nesɛi ara taseqqamut n ufran n wid ara yekken dagi, mačči nettnaɣ akked ukabar awḥid ɣef lecɣal-nni, tura ad ten-nxeddem nekni. Nekni, nenna-d win yebɣan ad yeg asarag, ad d-yemmeslay, ad d-yefk tikti-ines, mmreḥba yis-s.  Acu kan s talwit akked umennuɣ ɣef tektiwin mačči ɣef yimdanen. Nekni, nebɣa ad d-nexleq askasi, ihi win yesɛan asteqsi ad d-yas ad yefk i bab-is. Llan wid i d-yennan Chawki Amari yettleqqib-aɣ s les Brobros. Akken neḥṣa yakk awal-agi n Brobros d Mohia i t-id-yesnulfan.

Aṭas i d-yennan ixus useḥbiber ɣef Covid-19 deg tezrigt-a. Acu ara asen-tiniḍ ?
Am Lezzayer s umata, yella dɣa anda i ttqadaren iwellihen-is ? Nekk ur walaɣ ara : Deg ssuq ttemyedeggaren ; deg ttawilat n usiweḍ, ttemyedeggaren. Dagi ur ttemyedeggaren ara, xas akken yeqwa lɣaci.

Ɣef leḥsab-ik, i wacuɣer i yettili lɣaci dagi deg Bujimaɛ ugar n Tizi Uzzu ?
Ɣef wakken walaɣ nekk,wagi d rray kan, dagi, d amekkan i yeffɣen ɣef medden akk : D amekkan anda tella tlelli n umeslay ; anda-nniḍen d amekkan asemmaḍ ; dagi d amekkan alsi (humain), wid i d-yettasen, amur ameqqran deg-sen ḥemmlen ayen xeddmen, d imeɣnasen. Tgerrez tegnit anda llan, dɣa ufan iman-nsen xir n wanda-nniḍen.

Awal n taggara
Ṛreḥba n udlis n Bujimaɛ mačči d ṛreḥba kan n udlis amaziɣ. D ṛreḥba n udlis s umata. Ilaq ad d-nawi idlisen-nniḍen i wakken ad nwali amek ttxemmimen wiyaḍ, mačči gar-aneɣ kan. Tagi seg tama, seg tama-nniḍen, aseggas-a nxus tadrimt ula d Aseqqamu Aɣerfan n Tizi Uzzu ur aɣ-iɛawen ara. D acu kan, neddebbir aqerruy-nneɣ akken nwaɛa. Llan wid i aɣ-d-yettaken afus n tallelt.

Hocine Moula