Seg Xerraṭa ar Tsexriwt, ɛeddi akkin seg tɣiwanin n Yiderginen, Suq Letnin d Melbu, yeggra-d Wasif Ugeryun, deg usamar n Bgayet, deg yiwen n waddad yeskukruy imezdaɣ n temnaḍin-a. Ssebba, d mi uɣalen waman n wasif-a am wakken ssuren (xelḍen) akked yiḍumman teɣzi n wass. Ayen i d-yeɣlin d ageffur deg wayyur n yennayer, yeǧǧa iɣeẓran n tamiwin ad jehden, armi i as-d-rnan ahicur ugar n wayen yellan deg-s yakan. Ɣef wawal n yiɣermanen, annect-a d amaynut yessaggaden, acku urǧin yeḍra wayen i as-yeḍran akka tura i Wasif Ugeryun.
Dɣa, akken ad d-sneqsent seg temḍerrit-a takulujit, i yettḥazen srid tawennaḍt d umdan, heggant-d kra n tddukkliwin n usamar n Bgayet, ussan-a yezrin, yiwet n tigawt n usizdeg n wasif-a deg kra n yimukan ideg tettwaɣ liḥala maḍi. I lmend n waya, ayendin d ilemẓiyen i iheggan iman-nsen akken ad d-jemɛen seg wasif d rrifat-is akk tiɣawsiwin i yettenḍeggaren dinna d agudu, am yiculliḍen, ijeqduren, ikerṭunen, tibewwaḍin, tibeyyirin, d waṭas-nniḍen.
Ad d-nesmekti belli ula deg teftist n Melbu, tettban-d txessart-a n yiguduyen, imi ssan dinna ad as-tiniḍ d amḍiq-nsen. « Nekk ttwaliɣ d tiɣiwanin ansi iɛedda wasif-a i yestehzan cwiṭ ɣef tezdeg-is d uxemmem ɣef yimal n yiḍumman di tama-a. Ilaq-aneɣ anammas n umḍal atiknik deg usamar n Bgayet », i iwala yiwen n yilemẓi.
Si tama-nniḍen, llan wid i d-yettmeslayen ɣef usimes n wasif-a sɣur yimezdaɣ d yiseqdacen n ubrid aɣelnaw wis 09. « Yella d tidet uhicur i d-ttawin yiɣeẓran n tɣiwanin-nniḍen, imi kullec yettmaray deg Wasif Ugeryun. Maca, ula d imdanen i itessen iɣisem (alcool), ttekkan deg twaɣit n wasif-a. Kra n win ara yaɣen ɛecra neɣ ɛecrin n tebeyyirin, ad tent-iḍegger ɣer wasif zun akken d agudu », i d-yenna yilemẓi-nniḍen seg usamar n Bgayet.
M. K.