Accueil Tamazight « Asmekti » n Arezqi Lɛifa Salmi

Ajdid deg tira

« Asmekti » n Arezqi Lɛifa Salmi

109

Lḥif d waktayen n temẓi, d ayen ur itettu umdan. Yella win ur nessawaḍ ara ad ten-id-yejmeɛ ɣer yiwen umkan, yella win daɣen yessawaḍen ad ten-id-yejmel d taḥawact. D aya, i yexdem Arezqi Lɛifa Salmi, mi d-yegmer kra yellan d asmekti n temẓi-s, iga-as asefru-s deg tḥawact-is n tmedyazt. Dɣa, deg wussan-agi kan iɛeddan, i d-yessuffeɣ ɣer ssuq adlis amenzwaru n tmedyazt, i wummi isemma “Asmekti”. D yiwen wammud n yisefra n 116 n yisebtar, yettnuzu s wazal n 400 DA. Ma d tazwert n udlis-a, yexdem-as-tt uselmad Mass Racid Ḥusin Seḥnuni. “Asmekti”, d ammud n 60 n yisefra s snat n tutlayin: tamaziɣt d tefransist.

Yura-ten yakkan s teqbaylit, syin yessuqqel-iten i yiman-is ɣer tefransist, imi yella d aselmad n tefransist. Yefreq-it ɣef 6 n yiḥrcen-agi: Tayri, Lefraq n tayri, Ddunit d yiɣeblan-is, Lḥewj n yimawlan, Imdukal d wiyaḍ akked Ṛebbi/Ṣellaḥ d ssmaḥ. Tuget n yisefra yura, ttwarun s ṭṭabeɛ (talɣa) n yisefra n umedyaz Si Muḥend u Mḥend s kraḍ n tseddarin d 7-5-7 n tunṭiqin. Maca yella wanida ixulef lqaleb-agi, sya ɣer da. Am wakka, tuget n yisental iɣef yessefra Mass Salmi deg udlis-a, cudden ɣer tmetti s umata. Ad d-nesmekti kan belli, Arezqi Lɛifa Salmi, d amedyaz d amaru. Ilul deg useggas n 1956 di taddart n Yiɣzer Necbel di tɣiwant n Buɣni di Tizi Uzzu. Yella yakkan d aselmad deg uɣerbaz alemmas, uqbel ad yeffeɣ ɣer tɣimit. Nessaram-as afud igerrzen ɣer sdat.
A. A.