Accueil Tamazight Asmekti n Kamel Amzal

Udem gar wudmawen

Asmekti n Kamel Amzal

131

Ilul kamel Amzal neɣ Mağid At Waamar ass n, 13 deg tuber 1962, deg taddart Tiferdud deg lwilaya n Tizi Uzzu. Yeɣra deg uɣerbaz n taddart-is, syin ikemmel leqraya-s deg uɣerbaz alemmas Σmar At ccix akked tesnawit Mestafa Ben Belεid deg Σin Lḥemmam. Xas meẓẓi di leεmer, maca yefhem azal n tugdut d useḥbiber ɣef tutlayt d yidles amaziɣ imi yella gar yimeɣnasen n Tefsut n Yimaziɣen. Yewwi-d BAC deg useggas n 1981 akken ad yelmed tasbenyulit deg tesdawit n Ben Σeknun di Lezzayer tamannaɣt anda i d-yufrar gar yimezwura.

D timlilit-is d imaɣnasen am Cawqi Salḥi d Mustafa Baca ara yeldin i yilemẓi-a tiwwura n umennuɣ. Maca, ad ldint ula d tid n tismmin imi imṭurfa inselmen, suffɣen-d tuccar ɣer ilemẓi yeddan deg tẓelmadt armi wwḍen fkan-as i sem n cciṭan azeggaɣ. Deg yiḑ n umenzu n unbir n useggas 1982, yufa di texxamt tabrat anda ggulen ad yettwanɣa. Meɛana netta ur yugad ara acu kan akken kan yelseq ulɣu i d-yessawalen ɣer uslali n umazday imani i yinelmaden tẓedmen-d tarbaεt n yimṭurfa inselmen ɣer daxel n usensu s ijenwiyen d wuzzlan anda wwten ilemẓi s ujenwi armi yemmut, akken rnan kksen-as tablust-is, sentan-as ajenwi deg uεebbud-is.

Di tegnatin-agi ttweṭtfen 23 n yimdanen ɣer lḥebs, gar-assen Lassouli fateḥllah i d-yeffɣen d netta i yenɣan Kamel Amzal s ucehhed n Mass Σaziz Tari. Yettwaṭṭef ɣer lḥebs tmanya n yiseggassen, maca isεedda-d kan rebεa uqbel ad d-yeffeɣ s leεfu n Cadli Benğdid. Deg yiḑ n lmut-is, yura Kamel Amzal asefru ɣef lmut amzun tezwar-d s ameɣnas n tlelli, tugdut d umennuɣ ɣef usizdeg n tesdawit seg yimṭurfa d tuddsiwin yeskuffuren tugdut s daxel-is. Ass-a d amuli wis 57 n Kamel Amzal, maca ɣas ulac-it, llan yinelmaden yeddmen amennuɣ-is d azwel n tudert-nsen i tesdawit n usnerni d tussna, tilelli d tugdut.

Nisma Tigrine