Accueil Tamazight Brouillon auto

Amussu aɣerfan : Brouillon auto

64
- PUBLICITÉ -

Tanekra n ugdud n Lezzayer i yebdan seg 16 furar di Xerraṭa, tettwaḥseb ar tura gar tnekriwin akk yelhan i d-yellan deg umaḍal. Aya imi d-teffɣen yimelyan n yimdanen akken kan ad sutren s talwit, iberriḥen d ccnawi, aqcaɛ n unagraw i yeṭṭfen tamurt si 1962 armi d ass-a. Wammag ur d-yeffiɣ akken ad yerreẓ neɣ ad yennaɣ d temsulta. Nemgal, ugar n tikliwin timelwiyin, ula d asnulfu iger-it di ddhen, yefka-as akud-is. Gar wayen nwala d asnulfu, mi d-gan kra n yilemẓiyen s ukarṭun udmawen n unagraw d wamek teddun ad ɣlin deg ubidun n ugudu. Nwala daɣen yiwet n tmeṭṭut tleḥḥu s tadist, tessuffeɣ-d si tqendurt-is tafust n ukawičču, zun n mmi-s i yellan deg uɛebbuḍ-is, i yeṭṭfen aberriḥ ideg yura « Ayen i yimal-iw ». Yella-d daɣen yiwen n urgaz i d-iteffɣen s yiceṭṭiḍen imaziɣen s yisem n ugellid Cacnaq. D waṭas n yisnulfuyen-nniḍen i d-yettbanen yal ddurt.

- PUBLICITÉ -

Si tama-nniḍen, llan yicennayen i d-yesnulfan tizlatin d yiklipen i lmend n tnekra-a, rnu-as tikli i leḥḥun yal sem neɣ yal aram. Seg yicennayen-a, ad d-nebder Murad Ɛedwan, i d-yessuffɣen aklip « Jmiɛliman », ideg yeqqar « Jmiɛliman s Sliman, ad truḥem yiwen yiwen ». Ɛmiruc, yessuffeɣ-d aklip i izewwel “Ɛli Baba”. Murad Gerbas yewwi-d aklip “Terwi tebberwi” i lmend n tnekra-a. Tacennayt Yasmina daɣen, tga aklip s uzwel n « Alamma ruḥen » ideg tefka azal i uḍris, imi tenna deg-s abeɛda: « Tilelli seg wasmi tefra, d awal kan leɛmer telli. Yewwi-d ugdud tisura, tiwwura n lḥebs ad tent-yelli ». Seg wid yettwassnen ɣur yilemẓiyen, yella daɣen Muḥemmed Ɛellawa i igan aklip s yisem « Tilelli ». Uggten daɣen yilemẓiyen icennayen, neɣ ibujaden, i igan iklipen ɣef tnekra-a, seg-sen neḥsa s Ḥamid Neɣɣal, Sifaks Yal, Brahim Daris, Ɣilas Zikiw, Idir d Karim, akked Kusayla Ɛemruc.

M. K.

- PUBLICITÉ -