Tameddit n wass-nni n lḥed iɛeddan, i yessuli ttiɛad adelsan, i d-ijemlen ddeqs n yimedyazen d yiḥeddaden n wawal, wid i t-ittfeṣsilen i iwezznen tameslayt. Mbeɛd xemsa n wussan n temlilit d unecraḥ akked urfad n tmussni, i d-yesgerwen ayen din d amdan ɣer yiri n tesga n tmedyazt am wakken d tawacult tameẓyant, xas ma ɛeddan wussan-agi am lebraq.
Ihi, ass-nni n, 4 ɣuct iɛeddan, i temdel tiwwura-as tezrigt tamzwarut n Tfaska taɣelnawt n tmedyazt tamaziɣt iwumi semman “ Tafaska taɣelnawt amedyez-Iflisen Umellil”. Yella-d usiher-agi adelsan gar 31 yulyu d 04 ɣuct di taddart n Wat Sɛada deg tɣiwant n Sidi Ɛli Bunab, dayra n Tedmayt. Di tedwilt-agi tamezwarut, gan yimsuddsen n tfaska-a, tazrigt-a d tajmilt i tzeffant d tnaẓurt tameqqrant “Ourida Mezaguer” yettwassnen s yisem n “Anissa”, i yefkan aṭas i ssinima d tezlit taqbaylit. Mbeɛd xemsa n wussan n temsizzelt gar yimedyazen, yal wa d acu n tunṭict i d-yewwi, yal wa d acu n usentel iɣef yessefra…atg, yal amedyaz, yeɣra-d tlata n yisefra i ijerred di tfaska-a, yal wa s wacu i ikemmel icebbeḥ-iten, wa s ṣṣut-is, wa s unya, wa s usexdem n tfekka-s…atg.
Ɣer tama n waya, yella-d wahil d anesbaɣur gar timsikniyin, ameslay ɣef tmeddurt d umecwar n llal n tejmilt Anissa, asarag n Mass Cemmax Said d win n Mass Saɛdi Qasi, i d-yewwin ɣef tmedyazt taqbaylit, tufɣiwin, isikwan n usnulfu aseklan d tudyizt, timucuha, ccna, amezgun…atg. Tessuli tezrigt-agi tamezwarut n tfaska-a s ufraq n waṭas n warrazen i wid d tid i d-yufraren deg-s. Arraz n umɣar, yewwi-t umedyaz d umaru Saɛid Fellag, ma d arraz n yilemẓi, yewwi-t umedyaz ilemẓi Ɛezim Menzu. Arraz n tmeṭṭut, iṣaḥ-d tamedyzt tilemẓit Buciba Fatiḥa, ma d arras n teseqqamut n yinzurfa, tḥara-t-id tmedyazt Buseksu Linda, ma d arraz n tantala, yuɣal i umedyaz Buzid Mesṭafa. Arraz wis kraḍ, yettunefk i umedyaz ilemẓi Arib Massinisa, yettwassnen s yisem n tẓuri “Massi yurǧan tafsut”, ma d arraz wis sin, yerbeḥ-it umedyaz Yunsi Mulud, ma d arraz amzwaru, yufrar-d yis-s umedyaz Ibri Ḥamid.
Ad d-nesmekti kan belli, d Tiddukkla tadelsant Anegmu n taddart n Wat Sɛada, di Sidi Ɛli Bunab, Tadmayt s lmendad n Ugraw n yimedyazen yezdin amedyez, i d-iheggan tazrigt-agi tamezwarut “Amedyez-Iflisen Umellil”. Ɣer taggara maḍi, ad d-nesmekti s yisura ideg i d-turar tzeffant Anissa i tettcebiḥ diɣ ledwar ideg i d-turar, amedya: asaru Axxam n Dda Meẓyan, asaru Itij n Zira, asaru Tawrirt yettwattun…atg.
Gh. A.