Di lawan ideg kra n yidguden leḥḥun deg waṭas n tmura ɣef yir asefrek n yimḍebbren-nsen, llan ula d wid iluḥḥun ɣef d usenqes seg umihi n lḥamu i la yettidir umaḍal. Dɣa, ass n sem yezrin, 20 deg wayyur n cutember 2019, d imelyan n yimdanen i yeddan di tmura yemgaraden n umaḍal akken ad beggnen urrif-nsen seg tsertit tamirant i yettḍurrun takurt n Wakal. Deg yakk tiɣemmar n ddunit, ffɣen-d yigduden s iberdan nutni ttawin iberriḥen i yessawalen i uḥbas n twaɣit takulujit i la yettmaggan deg umaḍal akka tura, d ubeddel n tmuɣli tasertant sɣur yimasayen iɛlayanen n tmura.
Seg Hambourg di Telmant anda qeflen yiberdan s lɣaci, ɣer Ustralya d Sydney di Bangkok, ɛeddi akkin i Nairoby, ffɣen-d akk s yiwen n wawal i uḥerrek tura i lfayda n tegnaw send ad ifit lḥal maḍi. Ɣef wayen i d-tewwi teɣbalut-nneɣ, d timeyyatin n tikliwin i d-yettwasuddsen deg umaḍal merra, rnu tuget seg-sent d isdawanen d yinelmaden i yellan deffir-sent. Dɣa, yeffeɣ yisalli di internet d akken di New York yezmer lḥal wwḍen amelyun d kra n yinelmaden, seg 1 800 n yiɣerbazen izuyaz, i yelḥan i lmend n tmesbaniyin-a timaḍalanin.
D ayen yelhan, abeɛda ma neẓra d akken Marikan seg gar tmura i yessamasen aṭas tignaw. Rnu, ula d tuget n yimtawayen ɣef twennaḍt d usenqes seg uxdam n umunuksid n ukarbun, tetteffeɣ seg-sen. Ɣef tnaga n waṭas n yimeɣnasen d wid yesseḥbibiren ɣef twennaḍt, d asurif yelhan wayen akka gan yimdanen akken ad tbeddel ɣef tegnaw d twennaḍt-a deg umaḍal-a ideg nettidir. Ulamma aql-it taluft deg umsebḍi n yiberdan s anda ara terr. Ula di Fransa, yeṭṭaxxer uneɣlaf Nicolas Hulot seg udabu ɣef tmentilt imi yugi uwanek ad yeg kra n tigawin ilaqen i ubaɣur n twennaḍt.
M. K.