Accueil Tamazight D tawaɣit iɣef terbeḥ twennadt ciṭ, meqqar !

Ibeddi mgal Covid-19

D tawaɣit iɣef terbeḥ twennadt ciṭ, meqqar !

153

Segmi i d-iban Covid-19, deg taggara n useggas n 2019 ar ass-a, yenɣa d imelyan n yimdanen deg umaḍal. Anfadad n Kuruna, ulac tamurt yezgel, ulac win yeǧǧa d argaz neɣ d tameṭṭut; d llufan neɣ d amɣar, ulac afran. Ugar n 5 wugguren-agi tura segmi i d-inulfa waṭṭan-a, yal ass nsell d imelyan n yimuḍan i yenṭeḍ ɣer tama n terwiḥin i yetteḥwas war aḥbas. Aṭas n wuḍan d wussan iberkanen i iɛeddan ladɣa deg tmurt n Ṭelyan akked Marikan, anda mmuten wugar n 10 000 n yimdanen ɣef tikkelt, anef tura tmurt n Cinwa ideg i d-ilul. Mazal inadiyen ttkemmilen deg waṭas n tmura, akken ad as-d-afen ddwa, meɛna ar tura, ulac d acu i d-ibanen s wudem unsib.

Mbeɛd mi yemmeɣ deg umaḍal merra, yal tamurt tqubel-it akken tessen neɣ akken tezmer. Ass yecban ass-a, timura akk, kemnent ɣef yiman-nsen, ulac anekcum ulac tuffɣa. Tallit-agi n ukman, yemxallafen seg tmurt d tayeḍ, tegla-d s waṭas n wuguren deg waṭas n yiḥricen d taɣulin. Dɣa si tama n tdamsa, tuder mačči d kra deg umaḍal merra, imi ulac afaris, ulac ula d tunzzut deg ssuq. Ula d leswam n lpiṭrul ssuben-d mliḥ tineggura-a. Seg tama n tmetti, aṭas n leɛwayed i ibeddlen neɣ i yettwakksen, yecban asellem, axemmes, tirezzaf ɣer tama, ambaɛed n yimdanen s wugar n lmitra d ttarda n yiffasen.

a seg tama n twacult d umdan, tettwakkes tlelli n tuffɣa d uḥewwes, ɣer tama n uqelleq n medden imi zgan deg yixammen. Yesban-d, diɣ, waṭṭan-agi lexsas yellan deg uḥric n tezmert, ladɣa deg ttawilat n udawi. Am wakken i ḥussent twaculin s lexsas n umesruf imi ulac axeddim ɣer tama n wuguren-nniḍen. Annect-agi yakk, d uguren swacu i d-yegla, maca yegla-d diɣ s kra n tɣawsiwin yelhan deg waṭas n yiḥricen daɣen. Amedya di twacult, tuɣal-d neɣ tlul-d teywalt gar yiɛeggalen n twaculin, imi deg uxxam i ttilin merra, ɣer tama n twizi i d-yettilin gar-asen ɣef lecɣal. Am wakken daɣen, i d-iban deg tmurt n leqbayel tuget n yimdanen, fkan-as azal d tegnit i wakal n lejdud, imi wid yellan d ifellaḥen iban kemmlen axeddim-nsen, wa d tanqact, wa d afras, wayeḍ d aleqqem…atg.

Rnu ɣur-sen, imdanen-nniḍen yeǧǧan tamurt-nsen acḥal d iseggasen, uɣalen s axeddimn wakal, wa yesbab-itt i uxeddim, wayeḍ i temɛict, imi llan wid yeqqaren ur d-teqqim ara temɛict deg wakal. Diɣ-netta, deg yigran ad tafeḍ iselmaden, inemhalen, imɛelmen d wiyaḍ, ffɣen-d merra ad sɛeddin lweqt yerna ad xedmen tamurt-nsen yeqqimen niqal d lbur. Rnu ɣer waya, tuɣalin n temsetla neɣ tiwizi gar yimdanen deg tuddar, imi tineggura-a aṭas n tigawin i d-yettilin sya u sya.

D tigawin i xeddment tddukkliwin, tiseqquma n tudrin akked tɣiwanin ɣer tama n yidisan-nniḍen. Yal ass deg tudrin akked tɣiwanin, yettili-d usizdeg n tudrin d useɛlem n yimezdaɣ ɣef wamek i ilaqad ad iḥader iman-is umdan mgal avirus-a. Llant tudrin ikemnen iman-nsen s lekmal, ulac anekcum ulac tuffɣa, aɣlaq n yiberdan yessekcamen ɣer tuddar, ibeddi s idis n twaculin ixuṣṣen…atg.

Adaoun Abdelghani