Accueil Tamazight Deg Wagennun

AMENZU N YENNAYER - Ixf n useggas ɣer yimaziɣen

Deg Wagennun

144

Am yal aseggas mi ara d-yaweḍ Yennayer, ttheggint-d tddukkliwin ahilen s wayes ara d-smektint tafaska-agi n yixef useggas n yimaziɣen. D ansay n usmekti n umezruy d laṣel i tsuta i d-yettnekkaren. Ihi, ula d Tiddukkla tadelsant “Imnar n tdukli” n tɣiwant n At Ɛissa Mimun, ur tezgil ara tafaska-agi imi i d-sewwjed yiwen n wahil i yesɛan assaɣ akked yixef n useggas n yimaziɣen. Tasebḥit n wass n Yennayer, kkren yiɛggalen n tddukkla, ssersen tameqqunt n yizeǧǧigen ɣef temḍelt n yiwen n umeɣras d umeɣnas ameqqran i d-yefkan aṭas i yidles amaziɣ, wagi d Muḥend Aɛrab Bessaɛud.

Am yal tikkelt di yennayer, llant-d temsikniyin n wallalen yemxallafen am uẓeṭṭa, tiqendyar n leqbayel, tiwlafin i yerzan ɣer yennayer d umezruy-is. Syin akkin, xedmen yigerdan n temnaḍt-a yiwen n Karnaval s yiselsa iqburen n yimaziɣen. Am wakken i d-thegga tddukkla Imnar n tdukli yiwet n tzeqqa iwumi tsemma ‘Tazeqqa n lejdud’, anda i d-seknen allalen iqdimen i sexdamen yimaziɣen. Syin, d timsizwert “Imensi n Yennayer” n uswwi amensay ifazen akked wayen yeɛnan aḍris igerrzen s tutlayt n tmaziɣt.

Mi yezgen uzal, tella-d lweɛda n Yennayer i win i d-yerzan ɣer taddart n Tḥannut. Tameddit n wass, tettwahegga-d yiwet n tmeɣra n ccna sɣur yilmeẓyen akked tukci n warrazen i wid i d-yufraren deg merra umsizwer i d-yellan di tsebḥit-nni. D leqdic-a i tga tddukkla d iswi i useḥbiber ɣef tgemmi d umezruy imi irmad i d-thegga icudd ɣer tfaska-agi . Seg tama-s, yenna-d uselway n tddukkla Mas Adaoun Abdelghani : “ Iswi-nneɣ s tddukkla deffir n usfugel n yennayer 2970 : Tamezwarut, d aqabel n tewwura n useggas akked yimezdaɣ n tuddar-nneɣ. Tis snat, i usefhem n meddem belli yennayer mačči kan d seksu d uyaziḍ, maca d amezruy lqayen. Tis tlata, d areṣṣi di tmetti ansayen-nneɣ iqburen i wakken ur ttruḥun ara u d tagnit daɣen i yilmeẓyen i wakken ad issinen amezruy-nsen, ansayen-nsen, idles-nsen…atg. yennayer ameggaz i yal yiwen d yiwet.”

Souhila Yamani