Ddurt-agi yezrin i d-yeffeɣ walbum amezwaru n ucennay aqbayli Nourdine Akroure, ɣer tezrigin Tadukli Edition. Ad naf deg CD 6 n tezlatin i d-yettmeslayen s umata ɣef tayri akked yiɣeblan i ttidiren yilmeẓyen n tura deg tmetti.
Deg tezlit tamezwarut iwumi yefka isem « Degouliw » i yellan diɣ d isem n walbum, yewwi-d awal ucennay Akroure ɣef tayri n tin iḥemmel i mazal yettawi-tt deg wul-is. Acu kan, tayri-agi ur tdum ara imi i t-teǧǧa tinna iɣef yesleb, dɣa, dagi i d-yessenṭeq iḥulfan-is s tezlit iwumi yeqqar « Teǧǧa-yi ». Xas ulamma d nettat i t-yeǧǧan, meɛna ur tt-yesseḍlem ara s watas imi yerra kullec ɣef lmektub.
Ad nefhem aya mi ara as-tesleḍ i tezlit tis tlata iwumi yefka azwel « Lmektub ». Ɣef waya, dɣa, i yebɣa ad yuɣal d win-nniḍen i wakken ad tbeddel rray, ahat, ur tettruḥu ara, ad teqqim ad t-terǧu. Aya, ad t-naf deg tezlatin tis 4 akked tis 5 « Ad am-qqleɣ » d « Rǧu ». Akken yebɣu yili lḥal, teqqim neɣ truḥ, netta mazal-it yeɛceq-itt, mazal tasa tamcumt-nni, mazal udem-is deg wallen-is, ladɣa lexyal n lecfur-is imi i d-yessefra u iɣenna fell-asen deg tezlit taneggarut iwumi yeqqar « Lecfur-is ».
« Cennuɣ tawagennunit, meḥsub am yicennayen n dagi ɣur-neɣ n tama-agi n At Wagennun, yecban Fahem, Hamidouche, Ali Ferhati, Moh Oubelaid, Khelfaoui d wiyaḍ », i aɣ-d-yenna ucennay ajdid Nourdine Akroure i yesḥassfen aṭas ɣef wamek i yettili uḥric-agi n ccna deg unnar, ladɣa tamsalt n usekles akked usizreg.
Ɣef waya, dɣa, ikemmel deg wawal-is « Seg useggas n 2016 i ttnadiɣ ɣef tezrigin ara d-yessuffɣen album-agi-inu. Meɛna sanida rriɣ, ad d-mmaggreɣ uguren, ladɣa tamsalt-agi n yidrimen. Armi d aseggas-agi i d-ufiɣ win ukud mmsefhameɣ, syin yessuffeɣ-it-id smana-agi iɛeddan ». Ilul Nourdine Akroure ass, 06/11/1982, deg taddart n Ililen, tama n Makouda.
Hocine Moula