Accueil Tamazight Fkan-d leḥsabat n unebdu 2019

Aḥuddu aɣarim n Bgayet

Fkan-d leḥsabat n unebdu 2019

112

Deg ukṛaḍyur n unebdu 2019, seg yunyu armi d ɣuct, iqeddacen n Uḥuddu aɣarim, ffɣen azal n 7 962 n tuffɣiwin. Ama i usellek d uselḥeq n yimuḍan ɣer sbiṭaṛat, ama i ussens n tmes, neɣ i usellek n yimdanen deg yisehwa n yiberdan. Γef leḥsab n yimḍebbṛen n Uḥuddu aɣarim, seg tazwara n yunyu armi d 20 ɣuct 2019, ḍṛan 618 n yisehwa deg yiberdan n twilayt n Bgayet. Dɣa, amḍan-nsen yettader seg wayyur ɣer wayeḍ, ayagi imi deg yunyu 2019, ḍṛan 252 n yisehwa kan, ma yella di yulyu n yiwen useggas llan-d 233 n yisehwa. Syinna, yuder-d umḍan ɣer 133 di ɣuct. Ad d-nesmekti d akken deg yisehwa-agi, mmuten 10 n yimdanen u jerḥen 768 seg-sen.

Seg yiwet n tama, ma yella nmuqel i umḍan n wid yemmuten ilindi, ad d-naf belli amḍan yuder-d, imi deg 2018 mmuten 19, dɣa ayagi d ayen yeṣefṛaḥen. Lameεna seg tama-nniḍen, yuli ureqqas n yisehwa seg 594 deg 2018 ɣer 618 aseggas-a. D ayen i yeǧǧan imḍebbṛen n Uḥuddu aɣarim, ggren-d tiɣri i yinehhaṛen akken ad d-ttḥadaren iman-nsen ugar deg yiberdan, acku d tudert-nsen i d asfel n war aḥader-nsen. Seg tama n teftisin n Bgayet, 10 n yimdanen i iɣerqen deg unebdu n useggas-a, dɣa deg 5 737 n tuffɣiwin, iqeddacen n Uḥuddu aɣarim, sellken-d 2 997 seg lmut timḥettemt, deg-sen 2 532 ttwadawan imir-n, ma yella d 136 ttwawin ɣer sbiṭaṛ.

Γef leḥsab n teɣbalut-nneɣ, wid yemmuten ur qudren ara iṣuḍaf n lεum, ayagi imi 8 deg-sen mmuten deg teftisin n war taεessast, wayeḍ deg yisragen beṛṛa n tεessast, ma d aneggaru qqaren belli d ul-is i iḥebsen. Gar 10 yemmuten, llan 8 n yirgazen, d sin n warrac. Rnu ɣer waya, mazal yettkemmil unadi ɣef yiwen n yilemẓi i yesεan 30 n yiseggasen di leεmer-is, di teftist n Bulimaṭ. Aneggaru-a, seg twilayt n Tbatent, ur d-iban ara seg 13/08/2019. Di taggara, am wakken neẓṛa, ula d tiẓegwa ur slikent ara seg tiyitiwin n unebdu. Dɣa seg yunyu armi d ɣuct 2019, tender tmes deg 937 n yidigan di twilayt n Bgayet, anda i ffɣen yiqeddacen n Uḥuddu aɣarim 1 266 n tuffɣiwin. I yisalli, rɣan ugar n 1 667 Ha n yimɣan, 30% di tẓegwa, d 10 000 n ttjuṛ n yigumma, akked 2 780 n tpaliwin n tuga.

K.K.