Sadi Kaci, d aselmad amnadi s tefransist deg tsuqqilt akked tsekla n Tefriqt ugafa , yesselmad deg yisudduyen n Tmaziɣt akked tefrensist deg tesdawit n Tizi Uzzu. A-t-an ihi yessuffeɣ-d adlis-is wis sin iwumi yefka azwel “Iḍ n qessam Bu-tismin”, adlis i d-yeffɣen ddurt iɛeddan ɣur uxxam n usiẓreg Imru. Yesɛa 72 n yisebtar. Tamedyazt i yellan deg-s, tettmeslay-d ɣef tayri, anda amyaru yebḍa-t ɣer kraḍ n yiḥricen : Aḥric amezwaru, isemma-as “Leḥmala taqesḥant” , win sin d “Leḥmala tabaḥant”, aḥric aneggaru isemma-as “Leḥmala tafuḥant”. Ma nuɣal-d ɣer uḥric amezwaru, ad naf belli yettmeslay-d ɣef tmurt, ɣef wid yefkan tayri-nsen i tmurt. Ma yela d iḥricen-nni wiyaḍ, ad aken-neǧǧ, ad ten-teɣrem akken ad tezrem cbaḥa n tayri i ɣef i d-yettmeslay. Ilul Kaci Sadi deg 1980 deg At Laqser , Yiwwi-d turagt n tsuqilt deg useggas n 2003 , issufeɣ-d amud n tmedyezt ‘Imengar” deg useggas n 2008 , yesɛa Magister deg tsekla tamaziɣt. Yewwi-d Mass sadi aṭas n warazen, gar-asen : Arraz wis sin n tmedyazt di tejmilt i d as-yuɣalen i Mulud At Mɛemmar sɣur tiddukkla Adrar n Fad di Bgayet , arraz Si Muḥ U Mḥand deg Uzeffun, arraz Meɛtub Lwennas deg Tizi Uzzu.
Awal n umedyazt ɣef udlis-a : “Adlis-agi, yeffeɣ-d akken ad nerr tajmilt i 19 meɣres , i yimeɣrasen n tlelli n tmurt n lezzayer, i wid iḥemmlen tamurt n Lezzayer , d wid yekkaten ɣef tlelli s umata deg umaḍal. Yebḍa udlis ɣef tlala n yiḥricen igejdanen: Yiwen d leḥmala n tmurt d wayen yakk tesɛa, ama d akal ama d imdanen-is ama d ddin –is ama d timeslayin-is; yiwen d leḥmala n talsa s umata : izerfan n umdan , izerfan n tmeṭṭut , izerfan n tyemmat , n wid yettwaḥeqqren; wayeḍ d leḥmala n tmeṭṭut, leḥmala s tismin ɣef tmeṭṭut, leḥmala n yilmeẓyen d telmeẓyin. Iḍ n Qessam bu-tismin : Nettraǧu ad tbeddel teswiɛt, iḍ n Qessam-agi, ttɛawazen medden deg-s, ssaramen ad yili ubeddel, deɛɛun, qqaren-as iḍ n Qessam neɣ ass n Qessam. Ma yella d tismin : Qessam-agi, yettasem ɣef tmurt-is, ddin-is, tameslayt-is, talsa, ɣef tmeṭṭut-is, akken ad t esɛu ayen yelhan. Yerba tigi d tismin yelhan mačči d tismin tiberkanin , mačči d tismin-nni tiwraɣin. Ihi iḍ n Qessam bu-tismin, d izwal n sin n yisefra i yellan deg udlis , sduklaɣ-ten, suffɣeɣ-d azwel i udlis , ugmeɣt-id seg yisefra i yellan daxel akken ad ffkeɣ d azwel i udlis . Bɣiɣ ad rreɣ tajmilt i yiwen n yilemẓi Muhemmed Kaddour, wagi d yiwen n yilemẓi i d-yessuffɣen axxam n usiẓreg Imru, d win ur nesɛi ara yakk ttawilat. D ilemẓi i yekkren i udrar s tqabact tamectuḥt , yettɛawan ilmeẓyen akken ad d-ssuffɣen idlisen. Ssarameɣ, ad asen-yeɛǧeb i yimeɣriyen, akken daɣen adlis-a, buddeɣ-t i rruḥ n Mass Mohand Akli Haddadou i d aɣ-yeǧǧan ass n 19-11-2018”.
Yamani Souhila