Accueil Tamazight La Cinquième mascarade n Youcef Zirem

La Cinquième mascarade n Youcef Zirem

75

Aṭas n wawal d umeslay i d-ssegrant tmesbaniyin d unḥerrak i d-yettilin taggara-a deg wakal n tmurt. Tuffɣa n ugdud ɣer ubrid akken ad d-yini berka, ala i leḥkem amesbaṭli i inehren tamurt ɣer usyax 20 n yiseggasen-aya, teǧǧa iɣmisen, tiliẓriyin tuzzigin neɣ tigraɣlanin n tmura n berra, ad ḍefrent s lqerb tidyanin-a, segmi bdant ass n 22 furar 2019. Aneɣmas, amyaru Youcef Zirem, yuɣal 57 n yiseggasen ɣer deffir, yuɣal ɣer useggas n timmunent 1962, s udlis-is i d-yessuffeɣ ussan-a kan deg tmurt n Fransa, win iwumi yefka asentel “La Cinquième mascarade”. D adlis i d-yewwin awal ɣef waddad aserti d tudert tinmettit yeǧǧan ukkuẓ n yilmeẓyen ad ssirmen abeddel ɣer wayen yelhan, ɣer tlelli, ɣer yiseɣ, ɣer teɣdemt tinmettit u ɣer tayri yettwagedlen s tmuɣli-nniḍen. Maca ilmeẓyen-a, ɛerḍen ad ḍefren abrid n tidet, ɣas ma yella ttemlilen-d iɛewwiqen. Mass Youcef Zirem, yeglem-d tudert n Sabrina, Farid, Malika d Xaled yettidiren di lmizirya d teqṣeḥ ugar n 40 n yiseggasen-aya. Ameskar yessegra-d s uzbu n yilmeẓyen-a i mazal ssaramen tafat, ṭṭfen deg tikli ar sdat. Ungal-a s umata, yewwi-d ɣef yiwet n tallit n umezruy iɣef d-tɛedda tmurt seg 9 cutember 1962 ar tazwara n useggas n 2019. Ameskar n udlis Youcef Zirem, d amyaru, d amedyaz, d aneggal u d aneɣmas azzayri, ilul ass n 16 ɣuct 1964 deg Ukeffadu. Yettaru s tutlayt tafransist, yettidir deg tmurt n Fransa. Yekcem s annar n tira seg useggas n 1995. Gar yidlisen i yura : La Vie est un grand mensonge (1995), Le Chemin de l’éternité (2009), Le Semeur d’amour (2012), La Porte de la mer (2016), Matoub Lounès la fin tragique d’un poète (2018)…atg.
Khaled Achoui