Ass n letnayen, 29 deg yebrir-agi yezrin, llan-d yikayaden yerzan imdanen yellan deg wammas n uɛiwed n ttrebga i d-yezgan deg temdint tajdidt deg Wehran. Sserzin akayad-a wazal n 265 yimeḥbas ɣef teɣzi n wass. Tanezzayt, llan-d yikayaden n umezruy d tussna i wid yesɛan aswir n tesnawit, tutlayt n taɛrabt d tusnakt i wid yesɛan aswir amenzu deg usedwel. Ma d tameddit, sɛeddan tutlayt n tefransist i yiswiren deg sin.
D iselmaden n yiɣerbazen i d-yellan i lmendad n tɛessast n yikayaden-a d tuddsa deg tmarit n ufraq n yisteqsiyen d ujmaɛ n tferkitin n tririyin. Yal aseggas lawan-a, yettili-d ukayad akka am wa, acku kra seg wid ara d-yufraren deg tsuddutin-a, ssenqasen-asen-d seg wakud i asen-ḥekmen, tikwal yettaweḍ almi d aseggas neɣ sin i wid iḥekmen s 10 n yiseggasen d asawen. Daɣen d tagnit akken ad qerben acemma ɣer tudert icudden ɣer tmetti u ad ttun lemḥan d tmental iɣef ttwarzen.
K. A.