Ha-t-an tura zemmen tlata n yiseggasen, segmi tuɣal tmaziɣt d tutlayt tunṣibt deg tmendawt n tmurt n Lezzayer (2016/2019). Yadra ma yella-d usnerni-ines deg unnar neɣ d aɣebbar kan s allen.
Seg yimir ar tizi n wass-a, ur d-yelli ara waṭas n ubeddel deg tmuɣli ɣer temsalt-agi n tmaziɣt, ama deg uselmed-ines ama deg useddu-ines deg tedbeliwin n uwanek azzayri. Yal tasuddest tqeddec alaḥsab n tezmert-is d tmussni-ines, ar melmi ara ddukklen yiɣallen fell-as?
Ihi, skud mazal tamuɣli n tsertit teẓẓel fell-as, tugi ad as-teḍleq, ulamek ara frunt temsal-is. Yella-d, ɣef wakken i t-id-nnan, usbeddi n tkadimit n tmaziɣt tazzayrit, ara d-yelhu s tutlayt-agi tayemmat, maca ariḍa, yeḍra-d kan usbeddi-ines ɣef tferkit, ma d tasuddest s timmad-is, ur d-iban wacemma fell-as, ulamma banen-d 40 n yimdanen ara tt-iɛemren, maca ula d nutni, urɛaḍ ttwasunṣben ar ass-a.
Yella-d usmekti-ines deg Tizi Uzzu
I lmend n usfugel n umulli-agi wis kraḍ, yella-d leqdic d anesbaɣur ɣef teɣzi n sin wussan deg lwilaya n Tizi Uzzu. D ahil i d-yettwasuddsen sɣur Tanmehla n yidles n Tizi Uzzu, i d-yellan ass-nni n larebɛa d lexmis iɛeddan. Yebda wahil i d-yettuheggan, ass-nni n larebɛa, 06 deg waggur-agi n furar ideg nella.
Yella-d leqdic d anesbaɣur deg temkerḍit tagejdant n tɣuri taɣerfant n temdint n Tizi Uzzu. Tella-d deg-s rreḥba n udlis, anda i d-ḍrant ddeqs n temsikniyin n yidlisen yettwarun s tmaziɣt sɣur ddeqs n tezrigin ɣer tama n temsikniyin n yidlisen sɣur tisedduyin-agi : HCA, CNRPAH…atg.
Am wakken daɣen, i d-llan yisenza s yibuddan n yidlisen sɣur ddeqs n yimura d yimedyazen. Ma ɣef 10h00, yella-d usarag i d-yesddukklen umussnawen-agi d yimnadiyen-agi : Djelaoui Mohamed (aselway n tkadimit tazzayrit n tutlayt tamaziɣt), Imarazene Moussa (d aɛeggal deg tkadimit-agi), Guerchouh Lydia (d taɛeggalt deg tsedduyt-agi), Brahim Tazaghart (d amaru, d amsizreg).
Yezzi wawal deg usarag-agi ɣef usentel-a « Tutlayt d yidles amaziɣ : aseǧhed n tmagit d teslilest tazzayrit ». Ma ɣef 14h00, yella-d usenɛet n usaru « Baba Muḥ » n umsuffeɣ Smail Yazid. Am wakken daɣen i d-llan yisikwan i lmend n yigerdan i d-yerzan. Ikemmel daɣen leqdic ama deg Uxxam umezgun Kateb Yacine, s turart n tmezgunt-nni « Anwa Kečč ? », i yellan d afaris n Uxxam n umezgun n Tizi Uzzu.
Ula d Axxam n ssinima, yella deg ttiɛad, s uskan n usaru « Baba Muḥ » n umsuffeɣ Smail Yazid. Ma d ahil i yettwaxdamen i lmend n umulli-a, deg Uxxam n yidles Mulud Mɛemmeri, yella-d ass-nni n lexmis 07 deg furar, s waṭas n yirmad d temsikniyin (tin n tutlayt n tmaziɣt, tin n yidlisen akked tezrigin). Yella-d diɣ usarag i d-ijemɛaen imnadiyen-agi: Allaoua Rabhi (d aselmad deg tesdawit n Bgayet), Sadi Kaci (d aselmad deg tesdawit n Tizi Uzzu) d wiyaḍ. Imsirgen-agi, wwin-d awal ɣef tzeggart n tsekla tamaziɣt seg timawit ɣer tira.
Yella-d diɣ usenɛet n yiwen n usaru s teqbaylit ɣef ucennay Cherif Kheddam, ɣef 14h00 deg tzeqqa n umezgun n Uxxam n yidles. Am wakken daɣen, i d-yella leqdic ama deg Uxxam umezgun Kateb Yacine, s turart n tmezgunt-nni « Tiɛezriyin», i yellan d afaris n Uxxam n umezgun n Tizi Uzzu. Ula d Axxam n ssinima, yella deg ttiɛad, s uskan n usaru « Akeddab » n umsuffeɣ Ali Mouzaoui. Tella-d diɣ, tesfugla n ufraq n warrazen i yinelmaden i d-yufraren deg temsizzelt n tira, i d-yellan deg yiɣerbazen n tamaiwin-agi: Azeffoun, Boghni, Béni Yenni, DBK.
Adaoun Abdelghani