Mebɛed ddurt tanesbaɣurt n leqdicat idelsanen i lmend n yimuras n tefsut, i d-tettheggi yal aseggas tenmehla n yidles n lwilaya n Tizi Uzzu. Mazal ad ikemmel wahil-agi anesbaɣur i d-yettilin ama deg Uxxam n yidles Mulud At Mεemmer n Tizi Uzzu, ama deg Tneḍfart-is n Azazga. Tikkelt-agi, ad d-nawi awal ɣef leqdicat i d-yettin ddurt-agi ideg nella, imi i d-nemmeslay ddurt iɛeddan ɣef wayen yettwaxdamen ussan yezrin. Ddima ttilint-d temsikniyin-agi ɣef teɣzi n tɛecret tadelsant n yimuras ama deg Uxxam n yidles Mulud Mɛemmri n Tizi Uzzu akked Tneḍfart-is n Azazga, yal ass seg 09h00 alamma d 16h00 n tmeddit. Dɣa gar temsikniyin-agi tella tinna n yidlisen n yigerdan akked umezruy n tmurt n Lezzayer, seg 1830 alammi d 1962. Dɣa, deg tneḍfart-is n Uxxam n yidles Mulud Mɛemmeri n Azazga, ikemmel wahil s waṭas n leqdicat. Ass-agi n letnayen, 01 yebrir 2019, yella-d taṣebḥit-agi usikew n usuneɣ ɣef 10h00, ma ɣef 14h00, ad yili usiher n useḥḥar. I uzekka n ttlata, yetturaǧu ad yili ssbeḥ usikew ɣef useḥbiber ɣef twennaḍt, ma di tmeddit n wass, ad tili turart n tmezgunt “Aqcic bu tɣennant”. Ma d seldazekka n larebɛa, ad yili usikew n ssnitra taklasit deg tsebḥit n wass, ma ɣer tmeddit d tameɣra n ccna sɣur yigerdan.
Ahil n Uxxam n yidles n Tizi Uzzu
Iḍelli n lḥed, 31 meɣres 2019, yella-d usikew n ccḍeḥ n yigerdan imuḍan ssbeḥ-nni ɣef 10h00, ma deg tmeddit, tella-d tmeɣra n ccna sɣur terbaɛt Amaḍal Kids, i yessuznen aṭas igerdan i d-yerzan ɣur-sen-iḍelli n lḥed. Ass-agi n letnayen, ad yili usikew sɣur terbaɛt n “Les petits débrouillards”, ma ɣef 14h00, ad yili usiher n tddukkla tadelsant Tala, ara d-yuraren tamezgunt “Inebgi n teẓgi”. Azekka n ttlata, 02/04/2019, ad tettunefk tegnit i wurar, syin ɣur-s ɣef 14h00 deg tzeqqa tameẓyant n umezgun, ad d-yili usiher n useḥḥar Ninoz. Ma i seldazekka n larebɛa, 03/04/2019, seg 10h alamma d 12h00 n n uzal deg umḍiq n yisikwan, ad yili usikew n wuraren isesnegmayen, ma deg tzeqqa tameẓyant, ad tili turart n yiwet n tmezgunt n Uxxam n umezgun Kateb Yacine. Ass n lexmis i d-iteddun, ad yili d ass aneggaru n wahil-agi n yimura-as, ad tili tesfugla n taggara ɣef 14h00, s waṭas n leqdicat gar-asen; ccna, aseḥḥar…atg. Ɣer taggara, ad d-nesmekti kan belli leqdic-agi yebda ass-nni n ssebt, 23 meɣres 2019 iɛeddan, ad yeddu alamma d 04 yebrir-agi ideg nella.
Ghani Amazigh