Macahu tellemcahu ad tt-yeḍbeε Ṛebbi d asaru. Tagi γef yiwen n urgaz i yesεan nneyya tamsarit, acku ixeddem γef warraw-is, yeḍmeε ala deg win i t-id-ixelqen, mi i as-tenna tmeṭṭut-is: ‘’I tura kečč, akka kan ara teqqimeḍ d axeddam, ur tettnadiḍ ara γef ṛbeḥ-ik?’’Yerra-as: ‘’Ayen yellan fell-I, ad t-xeddmeγ, ayen-nniḍen γer Ṛebbi i yella, u yerna ma yebγa Ṛebbi ad rebḥeγ, ad d-yessiweḍ rbeḥ γer uxxam’’. Yiwet n tikkelt, truḥ tmeṭṭut-is γer lexla, ad tenqec. Ha-t-a tufa tasagimt ddaw n wakal teččuṛ d ddheb, seg wakken ulac deg-s nneyya d lxir, tuzzel γer watmaten-is tenna-asen: ‘’Rwaḥet ay atma, ufiγ agerruj, maca γurwat anwa ad ken-id-yeẓren γef wakal n urgaz-iw, ma ulac ad iẓer neγ ad icuk’’.
Tameddit deg yiḍ, ṣṣuben watmaten-is, skeflen-d asagem-nni, wwin-t γer uxxam-nsen. Mi wwḍen, smaren-t-id, afen-t yeččuṛ d izerman akk d tγirdmawin. Nann-as:’’Yyah, yyah, tebγiḍ ad aγ-tenγeḍ kemm d urgaz-im akken ad aγ-twertem’’. Nettat ur teẓri acemma acku deg uxxam-is i tella. Qqimen armi i neṣṣef yiḍ, ulin γer uxxam n wuletma-tsen, surgen-d asagem-nni seg cmini nnan-as: ‘’Mmtet tura, awer i d-tuγalem kemm wala argaz-im’’. Mi i d-yesla urgaz-is i kra yenγel-d si ssqef n uxxam-is, yekker-d, yaf-d taqaεet meṛṛa la tettmucεul s ddheb d lfeṭṭa, imuqel tameṭṭut-is yenna-as: ‘’Niγ nniγ-am asmi ara yi-d-yerẓeq Ṛebbi, yessen axxam’’.
Yahia Yanes