Accueil Tamazight Tɣab kan tfekka-s, yeqqim-d ccna-s

Asmekti n tmettant n Hamid Kacimi

Tɣab kan tfekka-s, yeqqim-d ccna-s

270

Ḥamid Qasimi neɣ Ḥamid Aɛiban, akken i as-ssawalen, d yiwen unɛaybu teclex ddunit seg wasmi yella d ilemẓi armi i t-teccelqef lmut si ddunit asmi yessaweḍ 36 n yiseggasen di tudert-is. Yettwassen deg uzniq n ccna, d yiwen unaẓur i d-yufraren s tezlitt-is  » Ur zṛiγ anda leḥḥuγ  » i d-yeffγen deg useggas n 1996 : yiwet n tezlitt i d-yessawalen γef waṭṭan-is imi ur yezmir ad yeddu γef yiḍaren-is . Ḥamid, iḍal-d γer ddunit ass n umenzu di yulyu 1968, deg Ziwi yiwet n taddart i d-yezgan di tγaltin n Uqfadu, anda yettidir akked yimawlan-is armi d asmi yesɛa 5 n yiseggasen i terza tyita-nniḍen, lmut yewwin baba-s yeǧǧa-n mmi-s d aleqqal yernu ur yezmir ad yeddu am netta am tizya-s.

D acu kan, teqqim-d yemma-s Keltum i t-irefden armi yessaweḍ 16 n yiseggasen, syin ula d nettat daγen, terna γer urgaz-is Buzid . Yeqqim-d d agujil mebla lwali imi wid ɛzizen fell-as d wid t-irefden ruḥen, yeqqim yettwarez. Cwi kan, yefka-as Rebbi sber deg yisefra : yessefra γef tayri, tudert, aṭṭan-is…atg. Aɛiban, iban-d i tikkelt taneggarut deg yiwen n tmeγra n umeddakkel-is. Ikemmel Ḥamid Qasimi iseggasen i as-id-yeqqimen deg uxxam n uletma-s, d nutni i t-irefden s ccuq, bedden γer tama-s armi d asmi yerna γer yimawlan-is ass n, 24 di γuct 2004, deg sbiṭer n Sidi Ɛic . Sgunfu deg talwit a Ḥamid. S yisem-is ad nerfed asefru i wakken ad t-naru deg uγerbaz ad tlemden. S yis-k, s tmedyazt-nwen ara  tedder wa tettidir tutlayt d yidles amaziɣ.Taqbaylit ur ak-tettu imi ‘’Tatut, tugar lmut’’.

Asγaṛ i deg ṭṭfeγ yeclex-d

 Tazmert, ulaḥed,

 Zṛiγ zher-iw ixuṣ.

 xas ulac γef acu ara nbedd

 Akken ad nezdi lqedd

 Di lehdur nseftutus.

 D temzi i ixeddmen γef temγer

 win itteddun izeṛ,

 D acu ideṛṛun di ddunit.

 Mačči am waṭṭan-iw yewɛer

 Cbiγ amesmaṛ,

 Tugi ad i yi-d teggri talwit.

 Wagi d asefru aɛiban,

 Ur nesɛi imawlan, Iḥekk-d γef ddunit-is.

 Ayen iḥus ur as-nettḥussu,

 Yeqqim la yettru,

 Yezṛa teǧǧa-t tezmert-is.

Tarik Benali