Tella-d ssmana-ya tfaska umi qqaren ussan n tewlaft deg Wehran neɣ « Les journées de la photo d’Oran » seg wass n sem 1 furar ar acer 3 deg-s. D tazrigt i d-yuɣalen i tikkelt tis sebɛa deg temdint n Wehran.
Tettwahegga-d aseggas-a sɣur tarbaɛt ISOCLUB (tarbaɛt n tewlaft n tiddukkla Les Nomades Algériens) s tallelt n Usudu Arumi deg Wehran (IFO-CCF). D tafaska tagraɣlant, imi i d-tessemliliy yal aseggas ugar n 400 n yiwellafen i d-yettasen seg yal tama n Lezzayer akked lberrani.
Aseggas-a, yella-d wahil meqqren, gar yisaragen d temsikniyen yemgaraden d temliliyin n lxedma (les ateliers). Ma d idgan ideg i d-tella tfaska-a, ad naf Asudu Arumi di Wehran, Asalay Ẓabana d tdukkla Les Nomades, seg 10h n ṣṣbeḥ almi d 18h n tmeddit. Aṭas seg wid iruḥen walan s lqerbb, imi tiwwura ldint akk i yimdanen. Tetturaju daɣen temsizelt n tewlaft i ikecmen dima deg tfaska-a, maca d tin ara d-yilin deg wussan n 24 ar 27 seg furar.
Aṭas n temsikniyin d yisaragen i d-yellan
Iwakken ad iwenneɛ wahil-a adelsan, ad d-sfaydin u ad d-awin ugar n yisallen wid iḥemmlen awellef d tugna. Llan-d waṭas n yisaragen d temsikniyin ilmend n waya, ɣef teɣzi n kraḍ n wussan-a. Ma nebder-d kan timsikent i d-sneɛten yilmeẓyen n terbaɛt “Mammouth photographie Club, (MPC)”, seknen-d ahil-nsen deg umraḥ n usudu arumi, segzan-d s lqerb ayen icudden ɣer tewlaft d yiberdan i d-yewwi ɣef uwellaf ad ten-yeḍfer akken ad d-yeffeɣ d asadar.
Akken daɣen i tekki terbaɛt n “Trekking and Adventures in Algéria” s leqdicat-nsen yemxalafen, umren ayendin wid iwalan leqdic-a. Ayen i yernan lbenna i temlilit-a, d akken kkin deg-s waṭas n wudmawen seg tmura n berra, akken daɣ i llan wid icerken amahil akked yizzayriyen. Ma d isaragen, ad d-nebder win yexdem Mass Sofiane Bakouri s usentel (Amek ara snerniɣ asenfar-inu di twellaft).
Akken i tga yiwen n usarag Massa Amira Hamdane (Abrid ɣer tugna). Seg tama-ines, yewwi-d Reza Deghati awal ɣef tarrayin tigejdanin i d-yessuffuɣen awellaf ifazen. Ma d iswi n tfaska-a, “ D tukci n wazal i tewlaft d tulmisin-is d usugen n uwellaf akken ad yili usnerni n tmussni n wid iqeddcen, iḥemmlen taɣult-a, acku akken neẓra, d yiwet gar yiḥricen n yidles ladɣa taggara-ya imi tennerna tetiknulujit”. I ɣ-d-yenna yiwen gar yimsuddsen n temlilit-a.
Kh. A